शुक्रवाःनिसें न्ह्याइगु नेवाः राष्ट्रिय राजनीतिक सम्मेलनया तयारी

मूस्याः ज्यापु

नेवाः स्वायत्त राज्य मंकाः संघर्ष समिितं वइगु शुक्रवाः १७ गतेनिसें नेवाः राष्ट्रिय राजनीतिक सम्मेलनया तयारी यानाच्वंगु दु । १७ गते सुथय् ७:३० ता इलय् ख्वपया लाय्कुलिइ सांस्कृति बाजा नापं मुनाः उगु लागां सांस्कृतिक झाँकी नापंया जुलुस पिकयाः ८:३० ता इलय् ख्वपया लाय्कुलिइ हे थ्यंकाः तःजिक उलेज्या समारोह याइगु जूगु दु । उगु र् यालीइ देय्न्यंकंया नेवाः प्रतिनिधित नापं स्वनिगःया थाय् थासय् च्वंगु सांस्कृतिक झुकी नापं अले ख्वपया नं नेवाः खलः पुचः नापं जातीय खलः पुचःयात प्रतिनिधितय्सं सांस्कृतिक झाँकी नापं ब्वति काइगु जूगु दु । उगु जुलुसय् द्वलंद्वःम्ह नेवाःतय्सं ब्वति काइ धकाः धाःगु दु । उगु सम्मेलन तःजिक क्वचायेकेगु निति नेवाः स्वायत्त राज्य मंकाः संघर्ष समितिपाखें पर्चा इनेगु थाय्थासय् पम्पलेट तिकेगु तकं यानाच्वंगु दु । अथे हे थाय् थासय् नेवाःतय्गु भेला नं तःन्हु न्ह्यःनिसें यानाः वयाच्वंगु खः । मोर्चां पिकाःगु पर्चाय् थुकथं च्वयातःगु दु -

थौं झीगु देय् संघीय लोकतान्त्रिक गणतन्त्रया लँपुइ न्ह्यानाच्वंगु दु । थ्व हे आजु पूवंकेत संविधान सभां न्हूगु संविधान दयेकाः राज्यया पुनःसंरचना यायेगु कुतः जुयाच्वंगु खः । नेपाःया छथ्वः सचेत नागरिक व आदिवासीया ल्याखं आः देसय् न्ह्यानाच्वंगु राज्यया पुनःसंरचनाया ज्याय् झी नेवाःतय्पाखें नं सकि्रय ब्वति कायेगु व च्यूताः क्यनेगु याना वयाच्वंगु खत । थ्व हे झ्वलय् वंगु दँ ११३० पोहेलाथ्व ९ पुस ११ गते कुन्हु येँया राष्ट्रिय रंगशालाय् छगू लख नेवाःत मुनाः नेवाः स्वायत्त राज्य घोषणा याये धुनागु जुल । न्हूगु संविधान व राज्य पुनःस्रंरचनाया सम्वन्धय् थ्व हे नेवाःतय् मंकाः तातुना व माग खः । तर तालय्महनाच्वंगु राष्ट्रिय राजनिित व राजनीतिक दलतय् इच्छाशक्तिया अभावया हुनि संघीयता लोकतान्त्रिक गणतन्त्रया नापनापं स्वशासन आत्मनिर्णय व अग्राधिकार दुगु नेवाः स्वायत्त राज्यया खँ संवैधानिक रुपं सुनिश्चित जुइ वा मजुइ धैगु अझं त्याज्यूगु मदुनि । थुज्वःगु इलय् झी नेवाःतय्सं थवंथवय। अझ संगठित जुयाः राजनीतिक दबाव ब्वलंकेत अझ सकि्रय रुपं न्ह्यज्यायेमाःगु व दुग्यंगु च्यूताः क्यनेमाःगु आवश्यकता दु । थुकिया निितं प्रस्तावित नेवाः राज्यया लागा दुने च्वंपि नेवाःत जक मखु देय् न्यंकच्वंपि नेवाःत छथाय् च्वनेफइगु राजनिितक लिधंसा ब्वलंकेमाः । थ्व हे तातुना नेवाः स्वायत्त राज्य मंकाः संघर्ष समितिया ग्वसालय् नेपाल संवत ११३१ कछलागा १३ व १४ शुक्रवाः व शनिवाःन्हियंकं नेवाः राष्ट्रिय राजनीतिक सम्मेलन जुइत्यंगु दु ।

निन्हु तक जुइगु उगु सम्मेलनया तयारीया झ्वलय् उलेज्या समारोह यायेत ख्वपय् हे नेवाः राष्ट्रिय राजनीतिक सम्मेलन उलेज्या समारोह समिति त्रिरत्न शाक्यया नेतृत्वय् दयेकाः व्यापक रुपं तयारी यानाच्वंगु दु । उगु व्यवस्थापन समिितं ता ई न्ह्यःनिसें हे ख्वपय् नेवाः खलः पुचः जातीय खलः पुचः राजनीतिक दलया खलः पुचः नापं नेवाः ख्यःया न्ह्यलुवातलिसे सहलह ब्याकेगु नापं सांस्कृतिक जुलुसय् फयां फक्व यक्व ख्वपया नेवाःत क्वकायेगु निति आन्तरिक रुपं तयारी यानाच्वंगु खः । थ्व हे झ्वलय् म्हिगः मंगलवाःनिसें ला उगु समितिपाखें खुल्ला रुपं हे प्रचार प्रसार यायेगु शुरु याःगु दु । ख्वपया नेवाःत उगु सांस्कृति जुलुस व उलेज्या समारोहलय् ब्वति कायेगु निितं तसकं उत्साहित जुयाच्वंगु दु धकाः त्रिरत्न शाक्यं धयादीगु दु ।

ख्वपय् उलेज्याझ्वः क्वचाये धुंकाः १७ गते हे न्हिनय् १२ बजेनिसें मध्यपुर थिमि नगरपालिकाया बोडेया कृषि विकास बैंकया प्रशिक्षण केन्द्रय् बन्द शत्र याइगु जूगु दु । बन्द शत्र १८ गते तक जुइ नापं उखुन्हु हे बहनी र् याली यानाः नेवाः राष्ट्रिय राजनीतिक सम्मेलनया घोषणा सभा तकं यायेगु तयारी जुयाच्वंगु दु धकाः नेवाः स्वायत्त राज्य मंकाः संघर्ष समिति मथ्यपुर थिमिया कजि कृष्णलाल गोजां धयादीगु दु ।

More Stories Like this