पालुङ्टार बैठकया आव्हान

- रुपा महर्जन -

विचार बहसया छगू दसुकथं माओवादीं न्ह्याकूगु मेगु बैठक खः गोरखाया पालुङ्गटारय् जूगु खुक्वःगु विस्तारित बैठक । थौं विश्वक्रान्तिया हे नेतृत्व यानाच्वंगु पार्टी एकीकृत नेकपा माओवादीया बैठकं बालुवाटारया न्ह्यः जकमखु साम्राज्यवादीतय्त धक्का बियाः विश्वया जनतायात एकताया सन्देश ब्यूगु दु । विश्व कम्युनिष्ट इतिहास स्वयेगु खःसा टुटफुटया दुःखद् घटनां पूवनेत्यंगु क्रान्ति नं दथुइ हे दीगु अवस्था दु । पार्टीदुनेया अन्तरसंर्घषयात ठिक ढंगं न्ह्यःने यंके मफयेवं उकि तःधंगु दुर्घटना नं जूगु इतिहास झीगु दथुइ दु । तर एकीकृत नेकपा माओवादीं विचारया बहस छगू थासय् दःसां तबि उकियात निरन्तरता बियाः क्रान्ति न्ह्याकेगु निर्णय ज्वनाः हाकनं जनताया न्ह्यःने वःगु दु ।

पालुङ्गटारया बैठक धइगु जनयुद्धया जगयात स्थापित यानाः उकिया हे जगय् क्रान्तियात निरन्तरता बिइगु धैगु खः । बहस जनयुद्ध वा जनआन्दोलनया उपलब्धीतय्गु रक्षा यायेगु खः । नेपाःया छगू ऐतिहासिक थासय् जूगु उगु बैठकय् समाजय् जुयाच्वंगु उथलपुथल राजनीतिक संघर्ष वैचारिक संघर्ष वर्ग संघर्ष लगायतया पार्टीदुने जुइमाःगु संघर्षयात न्ह्यःने यंकेगु निति सफल जुल । जनयुद्ध व जनआन्दोलनया उपलब्धीतय्गु रक्षा व न्हूगु प्राप्तिया निति छगू विधि कथं न्ह्याःगु बहसया रुपय् स्थापित जुल पालुङ्गटारय् जूगु बैठक । जनयुद्धया झ्वलय् आपालं मनूतय्सं थःगु छु नं छुं तंकूगु दु । उपि नं थ्व बैठक चिन्ताय् नं आधारित जूगु अवश्य खः । चिन्ता व चिन्तनया समिश्रणकथं पुष्टि जूगु पालुङ्गटारया बैठकय् एकता संघर्ष रुपान्तरण व रुपान्तरण सहितया एकता कथं एकीकृत नेकपा माओवादी न्ह्यःने वनेत सफल जूगु दु । विदेशी प्रतिकृयावादीत माओवादी नं हाकनं टुटफुटया स्थिति न्ह्यःने वंसा ज्यू धकाः अनेकौं कुतः यात । सकस्यां खंगु थुइगु कथं नं षड्यन्त्र अप्वः जुल । अथे जूसां नं उमिसं थःगु आज्जु पूवंके मफुत । गुकि हाकनं छक्वः माओवादी पार्टी दुश्मनयात बज्र मुक्का मुइकेत सफल जूगु दु ।
आः माओवादीं महान् जनयुद्ध व जनआन्दोलनया लक्ष्यकथं संविधान सभापाखें नेपाली जनताया आमूल परिवर्तनया आकांक्षायात संस्थागत यायेगु जनताया संघीय गणतन्त्रात्मक न्हूगु संविधान दयेकेगु व जनमुक्ति सेनाया वैज्ञानिक समायोजन सहित समग्र शान्ति प्रकि्रयायात पूवंकेगु कार्यभार ज्वनाः न्ह्यःने वःगु दु ।

देशय् ताः ईनिसें जुयाच्वंगु राजनैतिक गत्यारोधयात हे यथास्थितिवादीतय्सं निरन्तरता बियाच्वंगु दु । नेपाली जनतां प्राप्त याःगु उपलब्धीत धर्मनिरपेक्षता संघीयता गणतन्त्रया विरुद्ध मुठभेड व गृहयुद्धय् यंकेगु कुतः प्रतिकि्रयावादीतय्सं यानाच्वंगु दु । उकिया विरुद्ध नं फुक्क वामपन्थी देशभक्त व सच्चा गणतन्त्रवादी शक्तित छप्पँ जुयाः न्ह्यःने वनेगु निितं पालुङ्गटारया बैठक आव्हान याःगु दु । नेपाःया पृष्ठभूमिइ भारतीय हस्तक्षेप निरन्तर जुयाच्वंगु धइगु वास्तविकता खः । नेपाःया चीधिकःम्ह मचां नं उकिया अनुभूति याइ । नेपाःया शान्ति संविधान व सरकार दयेकेगु प्रकृयाय् नाङ्गो हस्तक्षेप भारतं यानाच्वंगु दु । फुक्क थासय् जुयाच्वंगु भारतीय हस्तक्षेपया विरुद्ध आः राष्ट्रिय स्वाधिनताया आन्दोलन तत्काल आवश्यकता जूवंगु दु । राष्ट्रिय स्वाधिनता जनवाद व गणतन्त्र धइगु अभिन्न विषय खः ।

संघीय गणतन्त्र धइगु नेपाःया शान्ति व संविधान नापं स्वानाच्वंगु विषय खः । उकिया निति नं छप्पँ जुयाः न्ह्यःने वनेमाःगु थौंया आवश्यकता खः । थुलिजक मखु देशय् अप्वयाः वनाच्वंगु महंगी भ्रष्टाचार तस्करी कालाबजारी बेरोजगारी असुरक्षा दण्डहीनता अराजकता आक्रान्त जुयाच्वंगु दु नेपाली समाज । अज्याःगु समस्या याकनं ज्यंकेत आव्हान याःगु दु । पालुङ्टारया बैठकं जनताया निति जक आव्हान याःगु मखु माओवादी पार्टी समेत उकि दृढता पूर्वक न्ह्यःने कार्ययोजना सहित वःगु दु । पार्टीया सिद्धान्तयात आधार दयेकाः सृजनात्मक पहल कदमी काःगु दु । संकीर्णताया घेरां पिहां वयाः नेपाःया मौलिकता सहित क्रान्ति न्ह्याकेगु उद्देश्य ज्वनाः न्ह्यःने वःगु दु । माओवादी पार्टी फुट जुइगु म्हगस स्वया च्वंपित अजूचायेक न्हूगु एकता सहित कार्ययोजना दयेकाः जनताया न्ह्यःने वःगु दु । मुर्दा शान्तिया विरोध यासें एकीकृत नेकपा माओवादीं पालुङ्गटारया बैठकं विदेशी हस्तक्षेपया विरुद्ध राष्ट्रिय स्वाधिनताया निति समग्र अशान्ति सहित न्ह्यःने वयाः जनतयात लामबद्ध जुइत इनाप याःगु दु ।

More Stories Like this