अनमिन लिपा छु ?

राष्ट्रसंघीय सुरक्षा परिषद्या उच्चस्तरीय पुचलं अनमिन नेपालं लिहां वनेधुंकाः छु यायेगु धयागु खँयात कयाः हालै एकीकृत नेकपा माओवादीया नायः पुष्पकमल दाहाल प्रचण्डयात गोरखाया पालुङ्गटारय् नापलायेगु ज्या याःगु दु । नेपाः शान्ति प्रकृयाय् ग्वाहालि यायेत वयाच्वंगु अनमिनयात सेना समायोजनया ज्या क्वचाये न्ह्यः हे नेपाःया सरकार व सरकारय् दुथ्यानाच्वंगु दलतय्सं भारतया इशाराय् अनमिनयात पित छ्वयेत्यंगु खः । देशय् न्ह्यानाच्वगु शान्ति प्रकि्रयाय् स्वानाच्वंगु सेना समायोजन व संविधान दयेकेगु ज्या क्वछिनातःगु इलय् जुइख्वाः मवः । न्हूगु संविधान मदयेकूतले वा न्हूगु जनपक्षीय संविधान दयेकीगु ग्यारेन्ति मजूतले सेना समायोजनया ज्या पूवनीमखु । संसद्वादी राजनीतिक दलतय्सं न्ह्याक्को बहः ब्यूसां वा क्वछिनातःगु ईदुने सेना समायोजन यायेहेमाः धाःसां अन्ततः संविधान निर्माण प्रकि्रया खःगुकथं न्ह्यःने मवंतले - थ्व सम्भव मदु । नेपाली राजनीतिक दलतय्त थुकियाबारे खास चिउताः मदुसां राष्ट्रसंघीय उच्चस्तरीय अनमिनयात थुकिया चिउताः दु व थुकिया कारणं राष्ट्रसंघया सशस्त्र द्वन्द्व व मचा सम्बन्धी ज्या याइगु पुचःया नायः क्लाउड हेलरया नेतृत्वय् वःगु पुचलं पार्टी नायः प्रचण्डयात नापलाःवःगु खः । पुचलय् अनमिन प्रमुख करिन ल्यानग्रेन व सुरक्षा परिषद्या स्थायी राष्ट्रया प्रतिनिधिपि दुथ्याःगु खः ।

राष्ट्रसंघया प्रतिनिधि पुचःयात प्रचण्डं शान्ति प्रकि्रया सेना समायोजन लगायतया विषयलय् थःपि प्रतिबद्ध दुगु व थुगु लँपु त्वःते मखु धकाः धयादीगु खँ उगु पुचलं सन्तोष प्वंकूगु दु । अननिलिपा छु जुइ धयागु न्ह्यसलं थौं अनमिनयात थें सकल नेपाःमिपिनिगु न्ह्यःने थाय् कयाच्वंगु दु । अनमिन दत्तले जुयाच्वंगु रेखदेखया ज्या आदि लिपा सुनां याइ निश्चितरुपं छगू विकल्प विना अनमिनया अनुपस्थिति समस्या सृजना जुइगु हे खनेदु । राष्ट्रसंघं नं थुकियाबारे सुझाव सल्लाह बीफु । तर विडम्बना छु जुइफु धाःसा अनमिनयात नेपालं पित छ्वयेधुंकाः अनमिनं ब्यूगु विकल्पया बारे नेपाःया दलाल सरकारं न्यनीला छाय्धाःसा दिल्लीया दरबारं पालय् यानातःपि कांग्रेस - एमाले लगायतया सरकारं ला अनमिनया सुझाव न्यनेगु पलेसा राष्ट्रसंघनापया स्वापू हे आः तापाका छ्व धाःसां नेपाःया दलाल सरकारं उकियात पालन यायेगु बाहेक छगः शब्द नं नवायेगु आँट यायेफैमखु । दकले ग्यानापूगु खँ ला छु जुइ धाःसा आर्थिक राजनीतिक धार्मिक हरेक क्षेत्रय् नाङ्गो हस्तक्षेप यानाः न्ह्यःने वयाच्वंगु भारतं आः जनसेना सुपरिक्षण व हतियारया व्यवस्थापनया निितं भारतीय सेना दुतकाल धाःसा छु जुइ ?

छाय्धाःसा वर्तमान एमाले - कांग्रेसया सरकारं विश्वस्त व भरपर्दो समूहया वा संस्थायात थुकिया निितं छ्यलेफु धकाः न्हापा हे धायेधुंकूगु दु । थुज्वःगु अवस्थाय् भारतं सुझाव सहित बीगु छुं नं कार्ययोजनायात अस्वीकार यायेगु हिम्मत कांग्रेस - एमालेया थुगु गुलाम सरकारयाके मदु । यदि थथे जुलधाःसा अन्तर्राष्ट्रिय समूहतय्सं नवाइ लाकि नवाइ मखु तर नेपाःमि जनतां थुकियात सह यायेफै मखु व भारतीय सेना वा उकिया हे लिधँसा दयेकीगु छु नं संघसंस्थाया उपस्थिति स्वीकार्य जुइमखु जुइफैमखु ।

More Stories Like this