एमालें भाय् हिलीगु संकेत
'आः बहुमतीया आधारय् न्हूम्ह प्रधानमन्त्री'
येँ (झीगु स्वनिगः)
संविधान दयेकेगु निति सहमतीय सरकार मदयेकं मगाः धकाः अडान तया वयाच्वंगु नेकपा एमालें आः थःगु भाय् हिलाः सहमतीय सरकारया थासय् बहुमतीय आधारय् न्ह्याः वनीगु संकेत खने दयावःगु दु । एमालेया केन्द्रीय छञ्याजे विष्णु पौडेलं आः एमाले सहमति प्रणालीयात त्वःताः बहुमतीय प्रणालिइ वनेगु जुइ धकाः म्हिगः मंगलवाः छगू ज्याझ्वःया दथुइ न्वंवानादीगु दु । वय्कलं सहमतीय सरकार गठन यायेत दलत असफल जुइ धुंकल धकाः न्ह्यथसें धयादिल आः ला हद जुइ धुंकल याकनं न्हूगु सरकार दयेकेमाः उकिया निति आः एमालें परिस्थिति स्वयाः मूल्यांकन यानाः रणनीति तयार याइ ।
एकीकृत माओवादीया विपक्ष थें जुयाः वयाच्वंम्ह एमालेया वरिष्ठ नेता कथं नाला वयाच्वंम्ह केपी शर्मा ओली पक्षधरया मनू कथं म्हस्यूम्ह पौडेलं अथे धयादीगु खः । वय्कलं एकीकृत माओवादीया नेतृत्वय् सरकार दयेके बिइगु अवस्था मदु धकाः धयादिसें आः न्हूम्ह प्रधानमन्त्री गुगु कथं छु प्रकृया ल्ययेगु धैगु खँय् स्पष्ट यानामदी । केपी शर्मा ओली पक्षयािपं नेतातय्सं आःया अवस्थाय् नेपाली कांग्रेसया प्रधानमन्त्रीया उम्मेदवार रामचन्द्र पौडेलयात हे प्रधानमन्त्री दयेकेमाः धकाः बहः बियाः वयाच्वंगु खः । लिपांगु इलय् वयाः ला ओली पक्षयापि नेतातय्सं एमालेया नायः झलनाथ खनालयात ब्यापक रुपं दबाव बिइगु तकं यानाहःगु दु धकाः एमालेया हे छम्ह नेतां धयादीगु दु ।
वइगु पुष २ गतेनिसें च्वनीगु केन्द्रीय कमिटीया मुँज्याय् आः सहमतिया प्रणालीयात त्वःताः बहुमतीय प्रणाली नालाः वनेमाः धकाः ओली पक्षयापिन्सं प्रस्ताव यंकेगु तयारी यानाच्वंगु दु धकाः नं धयादीगु दु । आः चुनावया निति न्हूगु प्रकि्रयाय् वनेगु अले उकिइ एमालेया नायः झलनाथ खनालयात उम्मेदवार यानाः बहुमतया आधारय् प्रधानमन्त्रीइ त्याकेगु धकाः आश्वासन बियाः बुहमतीय प्रणालीइ यंकेगु निति ओली पक्षं कुतः यानाच्वंगु खः ।
एमालेया स्वम्ह नेतात नायः झलनाथ खनाल प्रधानमन्त्री माधवकुमार नेपाल स्थायी समितिया दुजः केपी शर्मा ओली देय्या अन्यौलपूर्ण अवस्था नापं प्रधानमन्त्रीया चुनावयात तकं बेवास्ता यानाः गुगु कथं विदेश भ्रमणय् झायादीगु दु वय्कःपि नेपाः लिहां वयेवं हे अथे ओली पक्षं पार्टीया नायः खनालयात झन हे दवाव बिइगु तयारी यानाच्वंगु खः धकाः नं एमालेया नेतां धयादीगु दु । उकिया तयारी कथं हे एमालेया ओली पक्षधर कथं नालातःम्ह केन्द्रीय सचिव विष्णु पौडेलं एमालें आः सहमतीय प्रणालीयात त्वःताः बहुमतीय प्रणालीइ वनेमालीगु अवस्था वल धयादीगु खः धकाः नं वय्कलं कनादीगु दु ।
