कांग्रेसय् हानं नं पदया ल्वापु

जक पदया खँ वइ, फुक्क हे नेता कार्यकर्ताया छगू हे पहः जुइगु जुयाच्वन। नेपाली कांग्रेस दुने नं आः थ्वहे अवस्था वःगु दु। पार्टी नेता गिरिजाप्रसाद कोइराला मदयेधुंकाः जूगु न्हापांगु महाधिवेशनं ल्यःपिं न्हूगु पुस्ताया नेता कार्यकर्ताया दथुइ नं पदयात कयाः विवाद व गुटबन्दी शुरु जूगु दु। पार्टी सभापति सुशील कोइरालां संसदीय दलया नेता रामचन्द्र पौडेलयात उपसभापति पदय् मनोनित यायेगु धकाः सिफारिस यायेवं वय्कः थः हे पासापिनि दथुइ नं आलोचित जुयादीगु दु। वय्कलं छुं ई न्ह्यः तिनि पार्टी दुने छम्ह व्यक्ति छगू पदया सिद्धान्त कथं मनोनित यायेगु धकाः घोषणा यानादीगु खः। तर थम्हं यानागु घोषणाय् नं वय्कः लछि हे टिके जुयादी मफुत। सभापति कोइरालाया कार्यकाल सुथांलाक न्ह्याइगु सम्भावना मदया वंगु खँ थुकिं हे क्यना बी। उकिसनं वय्कलं पार्टीया महत्वपूर्ण पदय् थः हे समर्थक कार्यकर्तायात जक मनोनित यानाः न्हापा पार्टी दुने पक्षपात यात धकाः हे बिस्कं च्वं वंगु पुचःयात हानं छक्वः पक्षपाती व्यवहार यानादीगु दु। वय्कःया थ्व ज्यां न्हूम्ह सभापति कोइराला नं पुलांम्ह कोइराला थें हे गुटया जक नेता जू वनीगु खः लाकि धइगु ग्याःचिकु ब्वलंगु दु। वय्कलं पार्टीया मेगु गुटयात थाय् मबीगु कथंया गुगु व्यवहार क्यनादीगु खः उकिं वय्कःयात हे ज्या यायेत थाकुइका बीगु निश्चित दु। पार्टीया केन्द्रीय कमिटीइ देउवा पक्षया उपस्थिति न्हापाया सिबें क्वातुक दु। थ्व अवस्थायात नजरअन्दाज यानाः न्ह्याः वने फइ मखु। यदि न्ह्यायेगु कुतः यात धाःसा कांग्रेस हानं नं दुनें दुनें निगू पार्टी थें जुयाः न्ह्यायेत बाध्य जुइ माली ।

More Stories Like this