पालुङटार बैठकया रुप व सार

श्रीकृष्ण महर्जन

एकीकृत नेकपा (माओवादी)या खुक्वःगु केन्द्रीय विस्तारित बैठक वंगु शनिवाः क्वचाःगु दु। उगु बैठकयात माओवादीया नेतातय्सं भब्य रुपं सफल जूगु दावी याःगु दुसा मेमेपिंसं धाःसा विवाद हे ज्यंकेगु ज्या मजूगु कारणं असफल बैठक धकाः टिप्पणी यानाहःगु दु ।

माओवादीया न्हय्द्वःम्ह नेता व कार्यकर्तातय्त केन्द्रिकृत यानाः न्हय्न्हु तक लगातार गोर्खाया पालुङटारय् जूगु बैठकय् नायः प्रचण्ड, वरिष्ठ न्वकुपिं डा. बाबुराम भट्टराई व मोहन बैद्य किरणं थःथःगु राजनीतिक प्रतिवेदन पेश यानादीगु खःसां उगु प्रतिवेदन मध्ये छुं नं पारित मयासे स्वंगू हे प्रतिवेदनयात आधार दयेकाः मेगु हे मंकाः प्रतिवेदन तयार यानाः आः केन्द्रीय कमिटीया मुँज्याय् सहलह ब्याकेगु धकाः सहमति जुयाः विस्तारित बैठकं म्याण्डेट बिउगुलिं अन पेश जूगु नायः प्रचण्डया प्रतिवेदन असफल जुल धकाः नं टिप्पणी यानाहःगु खः ।

प्रतिवेदनया सवालय् स्वंगू हे प्रतिवेदनया खँ दुथ्याकेगु अले मिले जूगु खँ नापं मिले मजूगु खँ नं दुथ्याकेगु नापनापं मिले मजूगु खँय् बैठक, सम्मेलन व महाधिवेशनय् वनाः क्वःछीगु धकाः तकं नेताय्गु दथुइ सहमति जूगु खःसा थुकिया लागिं विस्तारित बैठकं म्याण्डेट नं बिउगु खः ।

माओवादीया विस्तारित बैठकयात यदि महाधिवेशनया मिखां स्वल धाःसा अवश्य नं माओवादी थुगुसीया विस्तारित बैठक असफल जूगु धकाः दावी याये फइ। तर थ्व महाधिवेशन मखु। थ्व ला केन्द्रीय कमिटीया अझ तःधंगु बैठक अर्थात केन्द्रीय विस्तारित बैठक जक खः धकाः थुइकल धाःसा छगू कथं जनवादी केन्द्रीयताया अभ्यास धकाः धाये फइ ।

विस्तारित बैठकय् दकलय् तःधंगु विवाद जूगु विषय धइगु आःया अवस्थाय् प्रधान शत्रु सु खः धइगु खँय् खः। माओवादीया नेतातय्सं अथे प्रधान शत्रु भारत खः लाकि नेपाःया घरेलु प्रतिक्रियावादी तत्व खः धकाः सहलह ब्याकूगु खः ।

माओवादीया थुगुसीया विस्तारित बैठकं स्पष्ट रुपं थ्वहे प्रधान शत्रु खः धकाः क्वःछीगु ज्या ला याःगु मदु बरु भारतीय विस्तारवादी नीति घरेलु प्रतिक्रियावादी नाप ल्वाकःबाकः जुयाः वःगु दु धकाः नीतिगत रुपं तयार याःगु दु। आःया अवस्थाय् तप्यंक भारत हे प्रधान शत्रु धकाः धाल धाःसां ज्या मछिनिगु अले घरेलु प्रतिक्रियावादी धकाः कांग्रेस व एमालेयात प्रधान शत्रु धाल धाःसां आःया संक्रमणकालिन राजनीतिइ संविधान निर्माणया नितिं म्हितेमाःगु भूमिकाय् ज्या मछिनीगु जुयाः स्पष्ट कथं खँ महसे भारतीय विस्तारवादी व घरेलु प्रतिक्रियावादीया अन्तरघुलन खः धकाः हःगु अनुमान यायेछिं ।

माओवादीया थुगुसीया बैठकय् फुक्क हे धइथें नेता व कार्यकर्तातय्सं नुगः चकंकाः थःथःगु बिचाः तयेगु झ्वलय् नेतातय्गु आलोचना यायेगु, नेतातय्त विरोध यायेगु निसें छगू कथं हाथ्या बीगु ज्या तकं याःगु दु। अथे नेता व कार्यकर्तात खुल्ला रुपं हे थःगु बिचाः तःगुलिं माओवादी दुने आः यक्व हे अन्तरविरोध दु धकाः माओवादी बाहेकया नेतातय्सं नापं मेमेगु ख्यःया मनूतय्सं दावी याना वयाच्वंगु दु ।

माओवादीं धाःसा 'विचार व अभिब्यक्तिइ स्वतन्त्रता कामकारवाहीलय् एकरुपता' धइगु नारा बियाः जनवादी केन्द्रीयताया अभ्यास यानागु खः उकिं आलोचना वइगु अले उकियात आत्मसात याना वनेगु हे कम्युनिष्ट पार्टीया जीवन्तता खः धकाः धयाहःगु दु ।

एकीकृत माओवादी दुने बैठकय् नेता व कार्यकर्तातय्सं छु गुलि आलोचना यात नापं विरोध यात धकाः गुगु कथं संचार मध्यमय् वल व ल्याखं स्वयेबलय् आः तकया दुने दकलय् अप्वः खँ पिहांवःगु बैठक थ्वहे खः धाःसां छुं पाइ मखु। उलि जक मखु स्वम्ह नेतातय्गु ब्यागलं ब्यागलं कथंया दस्ताबेजयात जिल्ला स्तरीय कार्यकर्तातय् थाय् तकं थ्यंकाः बहस याकेगु नापं वहे स्वंगू दस्ताबेजयात कयाः विस्तारित बैठकय् बहस यायेगु ज्या याःगु नं माओवादी पार्टीया इतिहासय् न्हूगु प्रयोग खः धाःसां छुं पाइ मखु ।

थुगुसीया पालुङटार बैठकं नेपाःया बर्तमान राजनीतिक अवस्थायात ध्यानय् तयाः शान्ति, संविधान व स्वाधिनताया नितिं स्वंगः 'स' या आन्दोलन यायेगु धकाः सहमति जूगु नापं संविधान निर्माणया झ्वलय् पंगः जुल धाःसा जनविद्रोह यायेगु धकाः क्वःछिउगु दकलय् महत्वपूर्णगु खँ खः। छगू कथं आःया अवस्थाय् जेष्ठ १४ गते तकया नितिं संक्रमणकालिन कार्यदिशा तयार यायेगु सतक, सदन व सरकारया सवालय् आन्दोलन यायेगु धकाः नेता व कार्यकर्तातय्सं अनुमोदन याःगु हे थुगुसीया बैठकया सार तत्व खः ।

जनविद्रोह आः हे यायेगु लाकि लिपा यायेगु धइगु खँय् नेतातय् दथुइ विवाद जुयाच्वंगु अवस्थाय् विस्तारित मुँज्यां स्पष्ट रुपं जनताया संविधान दयेके मबिसे षडयन्त्र यात धाःसा जन विद्रोह यायेगु जुइ धकाः स्पष्ट याःगु दु। नेपाःमि जनतां नं थ्व इलय् जनविद्रोह मखु संविधान दयेकेगु ज्या यायेमाल यदि संविधान दयेकेगु नापं जनताया आधिकार सुनिश्चित यायेगु झ्वलय् पंगः थन धाःसा माःमाःगु कथं जुइ धकाः थःगु हे कथं धयाच्वंगुयात ध्यानय् तयाः माओवादीं गुगु कथं कार्यदिशा तयार यात थ्व नेपाः व नेपाःमि जनताया नितिं छगू महत्वपूर्णगु ज्या जुया बिउगु दु। गन तक आः सदन व सरकारया सवालय् छु याना वनी धैगु खँय् धाःसा स्पष्ट रुपं माओवादीं खँ पितहःगु मदुनि। थुकिया मू कारण धइगु थःपिनिगु रणनीति दुस्मनतय्सं सिल धायेवं उकियात पूवंके फइ मखु धकाः तायेकाः हे जुइमाः अथे सार्वजनिक याःगु मदुनि।
एकीकृत माओवादीया केन्द्रीय कमिटीया आः याकनं हे मुँज्या च्वनाः संक्रमणकालीन कार्यदिशा कथं सतक, संसद व सरकारया नितिं संघर्षया ज्याझ्वः पित हयेगु धकाः धाःगु दु उकियात कयाः माओवादीया कार्यकर्तात गुगु कथं गुलि परिचालन जुइ व धाःसा स्वयेगु ल्यं हे दनि ।

kirtipurkrishna@yahoo.com

More Stories Like this