संसदय् प्रधानमन्त्री चुनावया घःकू

भद्रगोल अवस्थाया दथुं बजेट हये मालाः याकनं याकनं अन्त्य याना छ्वःगु संसदया अधिवेशन आः गबलय् गय् यानाः न्ह्याकेगु धइगु खँय् समस्या पिहां वःगु दु। मेगु सिबें नं थ्वहे संसद अधिवेशनय् प्रधानमन्त्री ल्ययेगु लागिं चुनाव नं जुयाच्वंगु जुयाः उगु चुनाव छु यायेगु धइगु नापं अन्यौलय् लाः वंगु दु। अधिवेशन क्वचाःगु कारणं चुनावया खँ नं क्वचाल धइगु छगू पक्षया राय दुसा मेगु पक्षं अधिवेशन क्वचाःसां चुनाव जारी दनि धकाः तर्क तयाच्वंगु दु। कानूनविद्तय्सं धाःसा थ्व सवालय् नियमावली मौन दुगु कारणं छुं धाये फुगु अवस्था मदु धयाच्वंगु दु। छुं जुयाः अधिवेशन सःताः हानं प्रधानमन्त्रीया चुनाव यानाच्वनेगु खःसा उकिं अधिवेशनयात हानं नं अर्थहिन याना बीगु निश्चित दु। अय् जुयाः आः सभामुख नापं राष्ट्रपति समेत थीथी पार्टीलिसे सहलह ब्याकेगु ज्याय् व्यस्त जुयाच्वंगु दु। धायेत ला थुकियात राजनीतिक समस्या धयाच्वंगु दु। तर थुकिया समाधान पिकायेगु ज्याय् धाःसा राजनीतिं तापाक च्वनेमाःपिं राष्ट्रपति व सभामुख सक्रिय जुयाच्वंगु दु। राजनीतिक पार्टीतय् पाखण्डीपह व गैर जिम्मेवारीं यानाः थ्व अवस्था वःगु खः। संसदया चिकुलाया अधिवेशन सःतेगु ई त्ययेधुंकूगु दु। अध्यादेशं हःगु बजेट नं अनं पारित ला याये हे मानि। थ्व बाहेक संसदं यायेमाःगु व संविधानसभां यायेमाःगु अनेक ज्यात बाँकी हे दनि। संसद सःताः अन प्रधानमन्त्री चुनावया घःकू तया बीगु धइगु देशय् शान्ति नं कायम याये मखु, संविधान नं दयेके मखु धकाः तप्यंक हे धाःगु जुल। अज्याःपिं राजनीतिक पार्टी व उकिया नेतातय्त जनतां सजाय बी हे माः। सजाय बीगु ई नं छन्हु वइ तिनि ।

More Stories Like this