ख्वपय् युद्ध स्तरं तयारी
नेवाः राष्ट्रिय राजनीतिक सम्मेलन
वइगु मंसीर १७, १८ व १९ गते स्वन्हुयंकं ख्वपय् नेवाः स्वायत्त राज्य मंकाः संघर्ष समितिया ग्वसालय् जुइगु नेवाः राष्ट्रिय राजनीतिक सम्मेलनया लागिं ख्वपय् युद्धस्तरं तयारी ज्या न्ह्याःगु दु। थनया नेवाः कार्यकर्तात चांन्हिं धइथें अन जुइगु उलेज्या समारोह तःजिक न्ह्याकेत थीथी कथंया तयारीइ लगे जुयाच्वंगु दु। र्याली व्यवस्थापन व स्वयमसेवक परिचालनया ज्या नेवाः राष्ट्रिय मुक्ति मोर्चां काःगु दु ।
उगु उलेज्या र्यालीइ ख्वपया थीथीइ संघ संस्था व नेवाःतय्त प्रत्यक्ष संलग्न यायेगु ताः तयाः छेँय् छेँय् वनाः पर्चा इनेगु, ब्यानर यखायेगु, मोटरसाइकल र्याली व कोण सभा नं यायेगु ग्वाहालि पुचःया मुँज्यां क्वःछिउगु दु ।
शुक्रवाः नेवाः स्वायत्त राज्य मंकाः संघर्ष समितिया नायः नरेन्द्रभक्त हाडाया उपस्थितिइ जूगु बृहत मुँज्यां उगु राष्ट्रिय सम्मेलन तयारी यायेगु निंतिं विराट गुथिया नायः त्रिरत्न शाक्यया अध्यक्षताय् ग्वाहालि पुचः नीस्वंगु खः।
ख्वपय् जुइगु नेवाः राष्ट्रिय राजनीतिक सम्मेलन तसकं भब्य यायेगु निंतिं छन्हु न्ह्यः हे ख्वपन्यंकं दिपाबली यायेगु, ब्यानर ज्वनाः प्रचार जुलुस यायेगु व मोटर मोटरसाइकलय् नेवाः स्वायत्त राज्यया ध्वाँय् ब्वयेकाः चाःहिलेगु नापं पोष्टरिङ यायेगु ज्या न्ह्याकूगु दु। प्यसः निसें न्यासः तकया ल्याखय् न्यय्गू ति जिल्लां वइपिं राष्ट्रिय सम्मेलनया प्रतिनिधितय्त विराट गुथिपाखें ख्वपय् ख्वपया नांजाःगु जुजुधौ तयाः धौबजि नकेगु नं तयारी यानाच्वंगु दु ।
ख्वपया कुमारी मय्जु सजिना शाक्यपाखें नेवाः राष्ट्रिय राजनीतिक सम्मेलनया उलेज्या याकेगु निंतिं माःगु ज्या न्ह्याकेत ग्वसाः खलकं कुतः यानाच्वंगु दु। नापं नेवाः स्वायत्त राज्य मंकाः संघर्ष समितिया नायः नरेन्द्रभक्त हाडाया सभापतित्वय् न्ह्याकीगु उगु उलेज्या समारोहय् लसकुस न्वचु ग्वाहालि पुचःया नायः त्रिरत्न शाक्यं बीगु कथं ज्याझ्वः क्वःछिनातःगु दु। ख्वपया लाय्कुलिं न्ह्याइगु तःजिगु र्याली न्ह्यः थीथी थासं झिगू घटकया र्याली लाय्कुली मुनि ।
ख्वपया थीथी खलः पुचःपाखें थीथी सांस्कृतिक प्याखं, बाजं व ब्यानर सहितया नेवाः वसतय् स्थानीय नेवाःत सहभागी जुइगु उगु उलेज्या र्यालीइ नेपाः लोकतान्त्रिक नेवाः संघपाखें येँनं झिंन्यासः व ख्वपपाखें जक न्यासःया ल्याखय् सहभागी हयेगु कुतः जुयाच्वंगु दु। नापं नेपाली कांग्रेस, एकीकृत माओवादी व नेकपा (एमाले)या जातीय मोर्चापाखें पार्टीयात हे आग्रह यानाः र्यालीइ सहभागिता अप्वयेकेगु कुतः जुयाच्वंगु दु ।
शुक्रवाः च्वंगु बृहत मुँज्याय् नेवाः देय् दबूया संरक्षक व नेवाः स्वायत्त राज्य मंकाः संघर्ष समितिया सचिवालय दुजः मल्ल के. सुन्दरं ख्वपय् खास यानाः राजनीतिक नेतृत्व यानाच्वंगु नेमकिपाया अध्यक्ष नारायणमान बिजुक्छेँ रोहितयात ज्याझ्वलय् सहभागी यायेगु निंतिं थःपिसं कुतः जारी यानाच्वनागु खँ कनादिल ।
नीम्ह दुजः दुगु मिडिया सेन्टर व नीम्ह हे जः दुगु सहजकर्ताया व्यवस्था जुइगु उगु सम्मेलनया बन्द सत्र धाःसा मध्यपुरया बोडय् जुइ ।
More Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
