नेवाः म्येँय् नेवाः ल्याय्म्हतय् डान्स (भिडियो ब्लग)

नेपालभाषाया लोकंह्वाम्ह गायक भीम तुलाधरं 'राजमति कुमति जिके वसाः पिरती..' हालाच्वंगु इलय् मनूत उगु हे लसय् डान्स यात । फ्लोरय् डान्स यानाच्वंपिंसं 'वान्स मोर' धासें माग यायेवं हानं छक्व स्टेजय् वःम्ह तुलाधरं राजमति कुमतिया रिम्क्सि हाःवलय् तुलाधरयात साथ बियाः डान्स फ्लोरय् दुपिं मनूत पूर्ण रुपं मनोराजन व जोशया साथ डान्स यायेत व्यस्त खनेदत ।

नेवाः म्येँया लसय् मज्जां डान्स फ्लोरय् प्याखँ ल्हुइगु ह्वताः चूलाकूगु खः नेवाः जागरण मञ्चं । दँय्दसं थें थुगुसी नं नेपाल संवत् न्हूदँया लसताय् नेवाः जागरण मञ्चया कवः नेवाः जागरण संकिपा मञ्चं शनिवाः नेवाः संगीत नाइटया याःगु खः ।

'झ्न जक माया क्यना..' बोलया म्येँ हालाः सतिश महर्जनं शुरु याःगु संगीत नाइटय् आपालं नेवाः कलाकारतय्सं म्येँ हाःगु खःसा वय्कःपिंसं हाःगु म्येँया लसय् फ्लोरय् दुपिं मनूत प्याखँ ल्हुगु खः । सुरेन्द्र श्रेष्ठ, गोविन्द ह्युमत, हरिशरण साय्मि, सानुबाबु महर्जन, मानिक शाही, रामकृष्ण खड्गी, सरोज बुधाचार्य व लसता जोशी लगायातया कलाकारतय्सं म्येँ हाःगु खः ।

अझ नच्चाम्ह कलाकार लुमिला जोशीं दुर्गालाल जोशीं च्वयादीगु 'ए फर एप्पल, बी फर बल..' म्येँ हालाः डान्स यानाच्वंपिंत लुचुलुचु ल्ह्वंगु खः । अथेहे डिजे डिपेन्द्र सिंहं डान्स फ्लोर क्वाकूगु खः ।

नेपाल समाचरपत्रया प्रवन्ध निर्देशक डिरेक श्रेष्ठं त्वाःदेवाय् मत च्याकाः शुरु जूगु संगीत नाइटय् जागरण संकिपा मञ्जया नायः विजयरत्न असंबरें लसकुस यानादीगु खः ।

संगीत नाइट लिपा जागरण संकिपा मञ्जया नायः असंबरें ज्याझ्वः तःजिक सफल जूगु धासें विशेष यानाः ल्याम्ह पुस्तायात ध्यानय् तयाः थुगु ज्याझ्वः याःगु जुसां मेपिनि नं उत्साहजनक ब्वति दुगु खँ नेपालमण्डलयात कनादिल ।

More Stories Like this