आत्मनिर्णया अधिकार सहित स्वायत्तता माः

पुष्पकमल दाहाल 'प्रचण्ड'
नायः एकीकृत माओवादी

थौं नेपाः राजनैतिक परिस्थति तसकं धरापया अवस्थां न्ह्योने वनां च्वंगु दु । नेपाःयात असफल राज्य घोषणा यायेगु नितिं थन तःधंगु षड्यन्त्रत जुयाच्वंगु दु । नेपालय् प्रधानमन्त्री ल्यय् मफुगु धासें नेपाःयात असफल राज्य घोषणा यायेगु षडयन्त्र जुयाच्वंगु खनेदु धाःसा मेखे भारतं अज्यागु कथंयाहे प्रचारबाजी यायेगु ज्या यानाच्वंगु दु । थुकिं स्पष्ट कथं देय्यात द्वन्द्वय् छ्वयेगु हे षडयन्त्र खः । देशय् शान्ति व संविधान दयेकेगु हे धरापय् लाइगु कथं षडयन्त्र जुयाच्वंगु दु । थज्याःगु परिस्थतिइ नेवाःतय्सं न्ह्याकाच्वंगु आन्दोलनं देय् व शान्तिया नितिं छक्वः हाकनं एकताया सन्देश विइत सफल जूगु दु । देशय् जुइगु परिवर्तनया संवाहक कथं स्वनिगःया जनतां न्ह्याबलें मू भूमिका म्हीता वयाच्वंगु वास्तविकता खः । थौं अज्याःगु हे ई हाकनं वयाच्वंगु दु । थौं तःधंगु न्ह्यसः धइगु संघीयता धर्मनिरपेक्षता व गणतन्त्र खः । तर थ्व वयेमबीगु डिजाइन षडयन्त्र जुयाच्वंगु दु । संघीयतां उत्पीडीतयात न्याय बीगु सिद्धान्त कथं न्ह्याः वंसा जातीय द्वन्द्व जुइमखु । उत्पीडीततय्त न्याय बीत प्रान्त विभाजन यायेमाः ।

उकिं भूगोल संस्कृतियात नं थाय् विइमाः । सामाजिक न्याय पलिस्था यायेत पहिचान सहितया संघीयता आवश्यक खः । अग्राधीकार बीमाःसां ताः ई तक अग्राधिकार बीम्वाः । उत्पीडन व अन्याययात क्वचायेकेगु नितिं संघीयताय् वनेमाः । तर थन आत्मनिर्णयया अधिकारयात छखे वांछ्वयाः संघीयताया खँ ल्हायेगु यानाच्वंगु दु थ्व धइगु पाखण्ड व जनताप्रतिया धोका खः । सुगौली सन्धिनिसें एकात्मक व केन्द्रीकृत सामन्ती राज्यसत्ता परनिर्भर जुसें न्ह्योने वनाच्वंगु कारण हे देशय् विकास जुइ मफयाच्वंगु खः । देय्या पराधिनतायात अन्त्य यायेगु नितिं संघीयता छगू जक समाधान खः । एकात्मक व केन्द्रीकृत सामन्ती राज्य जुयाच्वंगु इलय् विदेशीतय्सं अप्पुक्क न्यायेगु मिइगु यायेफूगु कारण देय् पराधीन व कमजोर जुइगु तर संघीय राज्य जुइवं आपालं राज्य संचालन जुइगु कारण सत्ता जनताय् विकेन्द्रित जुइगु व अज्याःगु षडयन्त्र असम्भव जुइ ।

नेपाःयात संघीयताय् मयंकेगु नितिं देशीविदेशी शक्तित लगय् जुयाच्वंगु दु । अज्याःगु इलय् नेवाःतय्सं क्यंगु मंका कथं न्ह्यानाच्वंगु आन्दोलनं एकताया सन्देश बियाच्वंगु नितिं आभारी प्वंका च्वना । नेवाः स्वायत्त राज्य संघर्ष समिति दुने थीथी पार्टी नापः आबद्ध मोर्चातय्गु मंकाः संगठन खः । थुकि् यानाच्वंगु ज्यां राजनीतिक दलतय्त नं सहमतियायेत आब्हान यानाच्वंगु दु ।

More Stories Like this