न्यूयोर्कया म्यूजियमय् दुगु नेपाःया कला बारे प्रवचन गोष्ठि

थौं सुथय् यलमाया केन्द्र यलध्वाखाय् "द रुबिन म्यूजियम : न्यूयोर्कय् नेपाःया कला" विषयस प्रबचन ज्याझ्वः जुल ।

अमेरिकी कलाकार नापं शिक्षक आदम स्वर्तं द रुबिन म्यूजियम अफ आर्ट, न्यूयोर्कय् मुंकातःगु नेपाःया कला नापं हिमाली कलाया विषयस प्रवचन बियादीगु खः । प्रबचन ज्याझ्वलय् हिमाली कलाया बारे जानकारी बियादिसें गान्धार (अफगानिस्तान व पाकिस्तानया उत्तरी क्षेत्र), भारतया उत्तरी क्षेत्र, नेपाः, तिब्बत, भुटान व मंगोलियाया कलाकृति नापं मूर्तिया विशेषताया बारे कनादिल । हिमाली क्षेत्रया कला विशेषयाना: तिब्बत, भुटानया कलाकृति विकास नेपाःया स्वनिगःपाखें जूगु व तिब्बत नापं भुटानया कलाकृतिइ नेपाःया कलाकारतय्गु योगदान दुगु खँ धयादिल ।

कोलम्बिया युनिभर्सीटीया आर्ट एण्ड एजुकेशनया स्नातकोत्तर तगीं, काठमाण्डौं विश्व विद्यालय, सेन्टर फर आर्ट एण्ड डिजाइन, मण्डिखाटारय् भिजिटिङ फ्याकल्टिया कथं अध्यापन याना च्वनादीम्ह भाजु स्वर्तं "द रुबिन म्यूजियम" गुकथं पलिस्था जुल व नेपाःया नापं हिमाली क्षेत्रया कलाकृति गुकथं मुंकेगु ज्या जुल धइगु खँ कनादीगु खः । नापं म्यूजियमय् नेपाः, भारत, तिब्बत व भुटानया सिँ धातु लिसेंया कलाकृति व पौभाःत अथेहे मंगोलियाया विशेषयानाः परम्परागत प्याखं हुलेगु इलय् पुनीगु ख्वाःपाःत दुथ्यानाच्वंगु खँया जानकारी नं बियादिल । उगु इलय् म्यूजियमय् दुगु दक्कलय् बांलाःगु मूर्ति व पौभाः नं स्लाइडपाखें क्यनेगु ज्या जूगु खः ।

Peace Corps या स्वयम् सेवक कथं निदँत्या पाल्पाय् ब्वंकादीगु खःसा "द रुबिन म्यूजियम अफ आर्ट"या "एजुकेशन विभाग"य् न्यादँ तक ज्या यानादीम्ह भाजु स्वर्त अमेरिकां लिहां वयाः थन हे ब्वंकेगु सोच दुगु खँ नं कनादिल । ज्याझ्वः यलया सुमेरु ग्राम कलाया ग्वसालय् जूगु खः ।

More Stories Like this