थीथी बिचाःया संश्लेषण शुरु
स्वम्हं शीर्ष नेतातय्सं कार्यकर्तायात थौं लिसः बीगु
पालुङटार (सन्ध्या टाइम्स)/थन न्ह्यानाच्वंगु माओवादी विस्तारित बैठकय् कार्यकर्तातय्सं बिउगु बिचाःयात कयाः पार्टीया शीर्ष नेतातय्सं संश्लेषण यायेगु ज्या शुरु याःगु दु। उकिया लागिं थौं सुथंनिसें पार्टी स्थायी समितिया बैठक थन हे च्वंगु दु। वंगु खुन्हु न्ह्यवंनिसें न्ह्यानाच्वंगु विस्तारित बैठकयात कन्हय् औपचारिक रुपं क्वचायेकीगु ज्याझ्वः दु ।
थौं सुथय् च्वंगु स्थायी समितिया बैठक सुथय् ९ बजे हे क्वचायेकीगु ग्वसाः दुगु खःसां न्हिनय् १ बजे तकं क्वचाःगु मदुनिसा बैठक ३ बजे तक न्ह्याइगु खँ धाःगु दु। अन मुनाच्वंपिं कार्यकर्तातय्त ३ बजे लिपा जक विस्तारित बैठक शुरु जुइगु जानकारी बीधुंकूगु दु ।
पार्टीया स्वम्ह शीर्ष नेतातय्सं प्रस्तुत याःगु बिचाःयात कयाः कार्यकर्तातय्सं थःपिनि बिचाः तयेगु ज्या म्हिगः क्वचायेधुंकूगु दु। आः अन वःगु बिचाःयात हे गुकथं निष्कर्षय् यंकेगु धकाः स्वम्हं शीर्ष नेतात च्वनाः संश्लेषण यायेगु ज्या जुयाच्वंगु खः। थ्व संश्लेषण प्रक्रियापाखें हे बैठकया अन्तिम निष्कर्ष पिकायेगु ज्या याइगु खः। लिसें कार्यकर्तातय्सं थःपिनि बारे तःगु न्ह्यसःयात कयाः नं स्वम्हं नेतातय्सं थौं लिसः बीगु खँ धाःगु दु। कार्यकर्ताया बिचाःयात समेत कयाः संश्लेषण यानाः पिहां वःगु अन्तिम निर्णय कन्हय् घोषणा यायेगु ज्या जुइ। माओवादीं आः गज्याःगु राजनीतिक लाइन ज्वनाः वनी, थःपिनि प्रधान शत्रुया रुपय् सुयात काइ, विद्रोहया तयारी याइ वा मिले जुयाः वनेगु धाइ, आदि आदि सकस्यां ध्यान बियाः स्वयाच्वंगु फुक्कं मुद्दाया लिसः कन्हय् पिहां वइगु खँ धाःगु दु ।
विस्तारित बैठकय् सहभागी ६० प्रतिशत कार्यकर्ता अध्यक्ष प्रचण्डया पक्षय् दुगुलिं कन्हय् वय्कःया बिचाःलिसे ज्वःलाःगु हे अन्तिम निर्णय पिहां वयेफुगु खँ सूत्रं धाःगु दु ।
