माओवादीं मालाच्वंगु देय्या प्रधान शत्रु

गोर्खाया पालुङटारय् न्ह्यानाच्वंगु माओवादीया विस्तारित बैठकं जःलाखःला देय् भारतयात प्रधान शत्रु माने याइगु सम्भावना दुगुलिं थ्व बैठकप्रति विश्वया हे ध्यान वनाच्वंगु दु। सत्ताय् वनीगु प्रवल सम्भावना दुगु छगू राजनीतिक पार्टीं थःगु देशय् गाक्कं प्रभाव दुगु छगू जःलाखःला देय्यात हे प्रधान शत्रु ठहर याइबलय् उकिया राजनीतिक तरंग गुकथं विकास जुइ, थ्व निश्चय नं स्वये बहःगु खँ खः। उकिसनं छगू इलय् माओवादी स्वय्मयात हे भारतं आश्रय बियातःगु कारणं थौं वहे माओवादीं भारतयात प्रधान शत्रु घोषणा याइबलय् उकियात भारतं गज्याःगु प्रतिक्रिया बीगु खः, व नं अवश्य हे महत्वया विषय जुइगु खँय् शंका मदु ।

थ्वहे खँय् सहलह जुजुं वयाः माओवादी दुने अन्ततः देशय् दुने हे च्वंगु घरेलु प्रतिक्रियावादीतय्त भारतं साथ बीगु ज्यायात हे प्रधान शत्रु माने याये माली धइगु बिचाः विकास जूगु दु। थ्व बरु यथार्थलिसे यक्व सतीगु खनेदु। छाय्धाःसां थौंया युगय् भारतं नेपालय् प्रत्यक्ष हस्तक्षेप यायेगु ज्या याइ नं मखु जुइ। यदि यात हे धाःसां उगु इलय् नेपाः बाध्य हे जुयाः चीनपाखे अप्वः आश्रित जू वनेमाली गुगु स्वयम् भारतया लागिं हितकर मखु। थौंकन्हय् थीथी सुविधां यानाः चीन भौगोलिक रुपं नं नेपाःपाखें उलि तापाः मजुइधुंकल। उकिं भारतं नेपालय् तप्यंक ल्हाः मतसे थन दुने हे च्वंगु गुगुं छगू पक्षयात ल्हातय् कयाः देशय् अस्थिरता कायम याना तयेफु। राणाकालंनिसेंया इतिहास पुइका स्वत धाःसां नं भारतं न्ह्याबलें हे छखें राज्य विरोधी तत्वयात थःथाय् आश्रय बियाः मेखें राज्ययात ख्याच्वः बियाच्वंगु दइ। थ्वहे भारतया नीति खः गुगु आः नं हटे जुइगु खने मदुनि ।

More Stories Like this