कांग्रेसय् मनोनयन ११ गते दु
येँ (झीगु स्वनिगः)
नेपाली कांग्रेसया सभापति सुशील कोइरालां ११ गतेदुने पदाधिकारी व केन्द्रीय दुजः मनोनयन याइगु जानकारी ब्यूगु दु । श्रोतं ब्यूगु जानकारीकथं वय्कलं उपसभापतिइ रामचन्द्र पौडेल महामन्त्रीइ डा. रामशरण महत व सहमहामन्त्रीइ कृष्णप्रसाद सिटौलायात मनोनयन यायेगु तयारी यानादीगु दु । वइगु १२ गते च्वनीगु केन्द्रीय समिति बैठकय् सभापति कोइरालां पदाधिकारी व केन्द्रीय दुजःतय्गु नांधलः प्रस्ताव यायेगु व मनोनयन यायेगु जानकारी बियादीगु दु । कांग्रेसय् उपसभापति महामन्त्री सहमहामन्त्री व मेमेिपं नीम्ह दुजः मनोनयन याये ल्यं दनी ।
व स्वयाः न्ह्यः छम्ह मनू छगू पद बिइगु धकाः हुइनाभुइना वयादीम्ह सभापति कोइरालां थःगु धापू अःखः संसदीय दलया नेता नापं जुयाच्वनादीम्ह पौडेलयात उपसभापतिइ मनोनयन यायेत्यनेवं कांग्रेसया सुं सुं नेता असन्तुष्ट जूगु दु । थ्व स्वयाः न्ह्यः सभापति कोइरालां बरिष्ठ नेता शेरबहादुर देउवायात जक केन्द्रीय दुजलय् मनोनयन यानादीगु खः । कांग्रेस विधानकथं महाधिवेशन क्वचाःगु निलायादुने केन्द्रीय समिति बिस्तार यायेमाःगु अवस्था दु । वइगु ११ गते कांग्रेसया महाधिवेशन क्वचाःगु निला बिइत्यंगु दु ।
