आः ज्या यायेगुलिइ एकरुपताया आवश्यकता

श्रीकृष्ण महर्जन

संविधानसभाया माध्यमं जनतां दक्ले तःधंगु पार्टीया रुपय् स्थापित याःगु एकीकृत नेकपा माओवादीया थ्व इलय् गोर्खाया पालुङटारय् विस्तारित मुँज्या जुयाच्वंगुिलं आः माओवादीं छु गज्वःगु कथंया क्वःछिना वइ धकाः आम नेपाःमिपिन्सं चासो तयातच्वंगु दु । नेपाःया राजनीतिइ तःधंगु प्रभाव लाकेफुगु नापं देशय् आमुल परिर्वतनया निितं धकाः न्ह्याः वनाच्वंगु एकीकृत माओवादीया थुगु मुँज्यायात संविधानसभाय् दुथ्याःगु थीथी राजनीतिक दल अझ ततःधंगु दल एमाले व कांग्रेसया नेतातय्सं तसकं चासो तयाच्वंगु खने दु । अले माओवादीया उगु मुँज्याय् वःगु बहसयात थःथःगु कथं ब्याख्या यानाः सार्वजनिक रुपं न्वंवायेगु तकं यानाच्वंगु दु । माओवादीया नेता व कार्यकर्तातय्सं विस्तारित मुँज्याय् न्ह्यब्वःगु बिचाः नेतातय्गु आलोचना ब्यागलं ब्यागलं कथंया प्रतिबेदनयात कयाः मेमेगु राजनीतिक दलया नेतातय्सं सार्वजनिक रुपं हे न्वंवाना माओवादी पार्टीया भविश्य मदुगु नापं माओवादी खःगु लँय् वनीमखुत धकाः तकं गुगु कथं सार्वजनिक रुपं अभिब्यक्ति बिइगु यानाहल थ्व छगू कथं राजनीतियात टिकडमबादी याइपिनिगु कुतः धाःसां छुं पाइमखु ।

माओवादीं न्ह्याबलें नं एकता संघर्ष व रुपान्तर धकाः गुगु कथं धयाः वयाच्वंगु दु थ्व हे माओवादीया आःया मूलभूत लँपु कथं जुयाच्वंगु दु । माओवादीं आः तक नं न्ह्याबलें छम्ह जक शत्रु जुयाच्वनी धकाः धयाच्वंगु मदु । लिपांगु इलय् माओवादी दुने भारतयात प्रधान शत्रु धकाः धयाच्वंगु खँ गुगु कथं वयाच्वन व छगू कथं गलत रुपं प्रचार जुयाच्वंगु दु । माओवादीं गबलें नं भारत धैगु हे प्रधान शत्रु धयाच्वंगु मदु । भारतं नेपालय् यानाच्वंगु सीमा अतिक्रमण नेपाःया राजनीतिइ लाकाच्वंगु प्रभाव अन्तर्राष्ट्रिय मान्यता कथं भूपरिवेस्थित राज्ययात वाणिज्य व पारवाहया सुविधा बिइमाःगु मबियाच्वंगु पुलांगु थः जक कतिला जुइक भारतं यानातःगु सन्धि सम्झौता न्हूधाः मयानाच्वंगु सवालयात कयाः हे भारततिय शासकतलिसे छगू कथं ल्वापु जुयाच्वंगु खः । अथे जूसां भारतलिसे गुिलं गुिलं खँय् धाःसा सहमति नं जुयाच्वंगु दु । जब नेपाःयात सार्वभौमसत्ता सम्पन्न मुलुकया रुपय् भारतीय शासकतय्सं स्वीकार याइ अबले भारत शत्रु जुइमखु । आःया अवस्थाय् ला भारतं नेपाःया हे थीथी ख्यः नापं राजनीतिक दलया नेतातय्त तकं प्रयोग यानाः थःगु स्वार्थ पुरा यानाच्वंगु अवस्थाय् अप्वः भारतलिसे नाप नापं घरेलु प्रतिकि्रयावादीतलिसे कचमच जुइगु छगू कथं शत्रु तायेकीगु स्वाभाविक हे खः ।

ल्वापुया नाप नापं माःगु इलय् एकता नं जुइ धकाः थीथी दलतलिसे यानाच्वंगु ब्यवहारं क्यनाच्वंगु दुसा माओवादी पार्टीइ दुने नं उगु हे कथंया सिद्धान्त लागू याइगु स्वभाविक हे खः । माओवादी पार्टी दुने न्ह्याबलें ल्वापु जक जुयाच्वनी मखु एकता नं जुइ अले न्ह्याबलें एकता जक जुयाच्वनी मखु ल्वापु नं जुयाच्वंगु दु । एकता संघर्ष एकताया नियम कथं हे माओवादी न्ह्याः वनाच्वंगु दु । उिकं माओवादीइ दुने हे द्वन्द्वात्मक भौतिकबाद लागू जुयाच्वंगु खः । माओवादी पार्टीं अनेकताया दुने एकता अले एकताया दुने अनेकता विविधताया दुने समानता अले समानताया दुने विविधता मालेगु ज्या यानाच्वंगु दु । माओवादीया विस्तारित मुँज्याया उदाहरण नं थ्व हे खः । माओवादी पार्टी दुने विविध कथंया बिचार वयाच्वंगु खःसा व विचारयात छथासं तयाः न्हूगु कथं सोच दयेका छगू हे धार ज्वनाः वनेगु कथंया कुचः जुयाच्वंगु दु । उलि जक मखु विस्तारित मुँज्याय् ब्वति कयादीिपं नेता व कार्यकर्तातय्सं थःिपं तसकं खुल्ला जुयाः बिचाः तयेगु नेतातय्गु आलोचना यायेगु भविश्ययानिितं चिन्तित जुयाः नेतातय्थाय् दनेगु याःगु दु । अले नेतातय्सं नं तप्यंक हे थःपिनिगु आलोचनायात न्यनेगु कार्यकर्तातय्गु भावना थुइकेगु नापं सकलसिगु बिचाःयात न्यनेगु नापं अन वःगु बिचाःयात संश्लेषण यानाः न्हूगु नेपाः निर्माणया निितं न्ह्याः वनेगु कुतः यानाच्वंगु दु । क्वय्या तहयािपं कार्यकर्तातय्गु भावना थुइकेगु व बिचाः न्यनेगु धैगु हे जनबादी अभ्यास खः ।

ज्यासना नईपं अर्थात ज्या यानाः नईपं मनूतय्तगु बिचाः न्यनेगु अभ्यासया रुपय् विस्तारित मुँज्या जुयाच्वंगु जुयाः छगू कथं विस्तारित मुँज्या सर्वहारा जनवादी अभ्यास जुयाच्वंगु खः धकाः धाःसां छुं पाइमखु । अथे सर्वाहारा जनवादी अभ्यास जुयाच्वंगुिलं माओवादीया उगु विस्तारित मुँज्यां नेपाःया निितं माःगु कथं छगू लँपु लुइकाः बहुसंख्यक नेपाःमि जनताया मागयात सम्वोधन यायेगु निितं माःगु कथं पलाः छिनाः वनी धैगु खँय् आशावादी जुइगु थाय् यक्व हे दु धाःसां पाइमखु । माओवादीया उगु मुँज्यायात स्वयेगु खत धाःसा अभिब्यक्ति आलोचना छलफलय् स्वतन्त्रता जूगु दुसा आः ज्या यायेगु सवालय् एकरुपता हयेगु ज्या धाःसा ल्यं दनि धकाः नेतृत्वं ध्यान बिइमाःगु आवश्यकता दु ।

More Stories Like this