विस्तारित मुँज्याय् रिपोर्टिङ क्वचाल

विस्तारित मुँज्याय् रिपोर्टिङ क्वचाल
थौं नेतातय्सं लिसः बिइगु

पालुङटार (झीगु स्वनिगः)

एकीकृत नेकपा माओवादीया न्ह्यानाच्वंगु विस्तारित मुँज्याय् ३० गू पुचःया ९० म्ह नापं स्वतन्त्र कथं निम्ह नापं यानाः गुइनिम्ह नेतातय्सं स्वम्ह हे नेताया राजनीतिक प्रतिवेदनयात कयाः थःथःगु बिचाः तयेगु ज्या म्हिगः विहिवाः क्वचाःगु दुसा थौं शुक्रवाः नेतातय्सं अन वःगु न्ह्यसःया लिसः बियादीगु जूगु दु । थौं दक्ले न्हापां सुथय् ७ बजेनिसें गोर्खाया पालुङटारय् हे एकीकृत माओवादीया स्थायी समितिया मुँज्या च्वनेगु तयारी याःगु दु । स्थायी समितिया मुँज्यां जक थौंया ज्याझ्वः तयार याइ । ज्याझ्वः कथं थौं सुथय् ९ बजेनिसें विस्तारित मुँज्याय् पार्टीया नायः पुष्पकमल दाहाल प्रचण्ड न्वकूिपं मोहन बैद्य किरण व डा। बाबुराम भट्टराई नं लिसः बियादी धाःगु दु । राजनीतिक प्रतिबेदनयात कयाः राज्य समितिया नेतातय्सं अन वःगु न्ह्यसःयात कयाः लिसः नाप नापं अन वःगु खँया संश्लेषण यायेगु ज्या जुइ धाःगु दु ।

थौं हे बहनी तकया दुने विस्तारित मुँज्या क्वचायेकेगु तयारी खःसां छुं जुयाः न्वंवाईपं नेतात स्वम्हसिबें अप्वः जुल धाःसा कन्हय् शनिवाः जक विस्तारित मुँज्या क्वचाइ धकाः धाःगु दु ।