नेविसंघपाखें अखिल क्रान्तिकारीयात आक्रमण

क्रान्तिकारीया ५ म्ह घाःपाः आक्रमण विरुद्ध चक्का जाम प्रतिरोध यायेगु ख्याच्वः

येँ (झीगु स्वनिगः)

एकीकृत माओवादीया अप्वःयाना नेता व कार्यकर्तात विस्तारित मुँज्याय् वनाच्वंगु इलय् लाकाः नेपाली कांग्रेसया भ्रातृ संगठन नेपाल विद्यार्थी संघया कार्यकर्तातय्सं अखिल नेपाल राष्ट्रिय स्वतन्त्र विद्यार्थी युनियनक्रान्तिकारीया कार्यकर्तातय्त आक्रमण यानाः न्याम्हेसित बांमलाक्क घाःपाः यानाब्यूगु दु । माओवादीया भ्रातृ संगठन अनेरास्ववियु क्रान्तिकारीया विद्यार्थी नेतातय्त येँया शंकरदेव क्याम्पसय् आक्रमण यानाः अथे घाःपाः यानाब्यूगु खः । कांग्रसया भ्रातृ संगठन नेविसंघया कार्यकर्तातय्सं आकाझाकां आक्रमण यानाः शंकरदेव क्याम्पस अखिल क्रान्तिकारीया इकाई नायः लोकेन्द्र धामी इकाई छ्यााजे कविन्द्र बोगटी केन्द्रीय दुजः प्रेम खड्का येँ जिल्लाया न्वकू गोबिन्द घिमिरे व जिल्ला दुजः अर्जुन थापायात घाःपाः यानाब्यूगु खः । धाःपाः जूिपं विद्यार्थीतय्त काठमाण्डौं मोडेल अस्पतालय् वासः यायेगु ज्या जुयाच्वंगु दु । क्याम्पसय् सेक्सन छुटेयायेगु विषययात कयाः नेविसंघया कार्यकर्तातय्सं अथे आक्रमण याःगु खः धकाः अखिल क्रान्तिकारीं धाःगु दु ।

अथे आकाझाकां आक्रमण याःगुया विरोधय् म्हिगः हे सुथय् शंकरदेव क्याम्पस लागा पुतलि सडकय् सांकेतिक रुपं चक्का जाम याःगु खः । चक्का जामया इलय् अपि्रय घटना मजुइमा धकाः ब्यापक रुपं प्रहरीत परिचाल याःगु खः । थ्व हे दथुइ अखिल क्रान्तिकारीया येँ जिल्ला क्याम्पस समिितं छगू विज्ञप्ति पिथना नेपाल विद्यार्थी संघया कार्यकर्तातय्सं थःपिनिगु कार्यकर्तातय्त आक्रमण याःगुया विरोध यानाः उगु घटनायत कयाः घोर भत्स्रना याःगु दु । अखिल क्रान्तिकारी येँ जिल्ला क्याम्पस समितिया नायः धुवविक्रम वलीं पिथनादीगु विज्ञप्तिइ दोषियात तत्काल ज्वनाः कारवाही यायेत माग याःगु दु । अथे हे उगु घटनायात कयाः क्याम्पस प्रशासनं माफी फ्वनेमाः धकाः माग याःगु दु । तत्काल दोषीयात कारवाही मयात धाःसा प्रतिरोध यायेगु जुइ धकाः ख्याच्वःबिसें उगु इलय् ब्वलनीगु लिच्वःया जिम्मा स्वयं प्रशासनं कायेमाली धकाः नं विज्ञप्तिइ न्ह्यथनातःगु दु । नेविसंघं गुण्डात छ्यलाः थःपिनि कार्यकर्तातय्त आक्रमण याःगु खँ न्ह्यथना तःगु दु ।