राष्ट्रिय ज्यापु दिवस थनिंनिसें शुरु
राष्ट्रिय ज्यापु दिवस समारोह - ११३१ थनिंनिसें शुरु जूगु दु । थीथी ज्याझ्वः याना हनेत्यंगु थुगु दिवसया थौं न्हापांगु न्हि सुथय् कंग अजिमायाथाय् नासः पुजायासें शुरु याःगु खः । यट्खा त्वाःया धिमेगुरु नानु महर्जनजुं नासःपुजा यासें थुगु दँया राष्ट्रिय ज्यापु दिवस समारोह - ११३१ हनेगुया उलेज्या यानादीगु खः ।
थौं हे न्हिनय् परम्परागत ६३ त्वाःया सहलह मुँज्या नं जूगु खः । मुँज्याय् राष्ट्रिय ज्यापु विकास कोषया संरक्षक व नेपाली काँग्रेसया सभासद् तिर्थराम डंगोलं थ्व दिवस हनेमाःगुया मू हुनिं थःगु पहिचान ल्यंकातयेगु निंतिं खः धकाः धयादिसें आधुनिक युगय् ल्वापु जुइगुया मू हुनि मध्ये छगू पहिचान नं जुयाच्वंगु न्ह्यथनादिल । ज्यापुतय् नं थःगु पहिचान ल्यंकाः तयेगुया लागिं हे नं यःमरि पुन्हिकुन्हु राष्ट्रिय ज्यापु दिवस हनेत्यनागु जानकारी बियादिल ।
ज्याझ्वलय् स्वयंसेवक उपसमितिया संयोजक सेख नारायण, प्रचार प्रसार उपसमितिया संयोजक न्हुच्छेकाजी महर्जन, आर्थिक उपसमितिया इश्वरमान डंगोल, संयोजन समितिया संयोजक सन्तु महर्जन, कार्य व्यवस्थापन उपसमितिया संयोजक पूर्ण नारायण, राष्ट्रिय ज्यापु विकास कोषया नायः चक्रमान डंगोल व ६३ त्वाःया प्रतिनिधि कथं वंघः त्वाःया नायः शरद कुमारजुं न्ववानादीगु खः । कंग अजिमा खलः, यट्खा त्वाःया नायः रामकृष्ण महर्जनया नायःसुइ जूगु थुगु ज्याझ्वलय् राष्ट्रिय ज्यापु दिवस समारोह समिति ११३१ या सदस्य सचिव धन बहादुर महर्जनं लसकुस यानादीगु खः ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
