प्रधान शत्रु बारे पुनर्विचार
भारत व घरेलु प्रतिक्रियावादी अन्तरघुलन
पालुङटार (सन्ध्या टाइम्स)/थन न्ह्यानाच्वंगु माओवादीया विस्तारित बैठकं थःपिनि प्रधान शत्रु भारत याकःचा जक मजुसे घरेलु प्रतिक्रियावादीलिसे घुलमिल जुयाः वइगु भारतीय विस्तारवादी नीति खः धकाः ठहर याःगु दु ।
वंगु आइतवाःनिसें न्ह्यानाच्वंगु उगु बैठकय् पार्टी अध्यक्ष प्रचण्डं आःया अवस्थाय् भारतयात हे प्रधान शत्रु तायेकेमाः धयातःगु राजनीतिक प्रतिबेदन न्ह्यब्वयादीगु खःसा उपाध्यक्ष डा. बाबुराम भट्टराईनं घरेलु प्रतिक्रियावादीयात प्रमुख शत्रु तायेकेमाः धइगु प्रतिबेदन न्ह्यब्वयादीगु खः। प्रधान शत्रुया बारे फरक फरक अवधारणा वःगुलिं कार्यकर्तातय्सं भारत तप्यंक वइ मखु,
घरेलु प्रतिक्रियावादी नाप स्वानाः जक वइगु जूगुलिं आः भारतीय विस्तारवादी व घरेलु प्रतिक्रियावादीया 'अन्तरघुलन' यात प्रमुख शत्रु तायेकेमाः धकाः सुझाव बिउगु खः। आपालं सहभागी कार्यकर्तातय्सं थ्व बिचाःयात बः बिउगुलिं आः थःपिनि प्रधान शत्रुया बारे न्हूगु हे धारणा दयेकीगु सम्भावना दुगु खँ धाःगु दु ।
बन्द सत्रया झ्वलय् म्हिगः तक ३० गू पुचःया स्वम्ह स्वम्ह नापं स्वतन्त्र प्रतिनिधितय्त १०-१० मिनेट न्ववायेगु ई बिउगु खःसां थौं ६-६ मिनेट जक ई बिउगु दु। विस्तारित बैठक फयांफछि ताःहाकः मयायेगु लागिं अथे ई क्वपाःगु खः। न्यान्हुया दुने क्वचायेकेगु धयातःगु थ्व बैठक न्ववाइपिं यक्व दुगुलिं आः ताःहाकः जुया वनीगु सम्भावना ब्वलंगु खँ सीदुगु दु ।
३० गुलिं हे पुचःया प्रतिनिधितय्सं न्ववाये धुनेवं हानं नेतातय्सं लिसः बी मानिगु नापं अन वःगु खँयात संश्लेषण यानाः लिच्वः नं पिकाये मानिगु जुयाः हे नेतात हथाय्चाःगु खँ नं धाःगु दु ।
माओवादीया थुगु बैठकय् थ्व पार्टीं भारतया विषयय् छु बिचाः तइ धकाः अन्तर्राष्ट्रिय ख्यलं नं ध्यान बियाः स्वयाच्वंगु दु ।
