कांग्रेसय् छम्ह व्यक्ति छगू पदया कुतः

नेपाली कांग्रेसया सभापति सुशील कोइरालां आः पार्टी दुने 'छम्ह व्यक्ति छगू पद' सिद्धान्त कथं ज्या यायेगु घोषणा यानाः कार्यकर्ताया नुगः त्याकादीगु दु। पार्टीया थीथी पदय् थःपिं च्वनेगु धकाः अति आकांक्षा तयाः वइपिं नेतातय् ल्याः तसकं अप्वया वयेवं वय्कलं थ्व नीति कायेगु बिचाः न्ह्यःने तयादीगु खः ।

खतुं न्हापा गिरिजाप्रसाद कोइराला दुगु इलय् नं कांग्रेसं छम्ह व्यक्ति छगू पद नीति कथं ज्या यायेगु कुतः जूगु खः। तर अबलय् थ्व सम्भव मजुल। अबलय् सम्भव मजूसां आः सम्भव जुइगु यक्व सम्भावना दु। छाय्धाःसां आःयाम्ह सभापति सुशील कोइरालायात पार्टी दुने थः काय्म्ह्याय्, भिंचा, काय्चा वा सूसु थःथितिपिंत च्वय्या पदय् हयेमाः धइगु लोभ मदु। वय्कः थःहे नं छम्ह सन्त पहःयाम्ह मनू खः। गिरिजाप्रसाद कोइरालायात थें वय्कःयात परिवारया बन्धन मदु। उकिं वय्कलं चाहे जुल धाःसा थ्व ज्या यायेफु। हानं थ्व ज्या धइगु पार्टीयात भिं यायेगु लागिं हे नं खः। नेपाली कांग्रेस दुने ब्वलनाच्वंगु गुट उपगुटया ल्वापुयात सदांया लागिं मदयेका छ्वयेगु खःसा थ्व नीतियात नाला मकासें नं मगाः। छगू गुटया उदय जुइसातकि मेगु गुट पाचुक हे मदया वनीगु थेंज्याःगु घटनात कांग्रेस दुने जुइगु याः। थुकिं आपालं सक्षम नेता कार्यकर्तात पलायन नं जुया वनाच्वंगु दु गुगु पार्टीया लागिं नोक्सान खः। यदि भविष्यय् पार्टीयात हानं हानं अज्याःगु नोक्सानीपाखें बचे यायेगु खःसा फुक्कं नेता कार्यकर्तायात थाय् दइ कथं थज्याःगु पलाः ल्ह्नेमाःगु आवश्यक दु। पार्टीया हित स्वइपिं सकलें नेता कार्यकर्तां सभापतिया थ्व ज्यायात साथ बीमाः ।

More Stories Like this