थँबहिलय् छेँय् मि नल १० लाखया क्षति
सानुकाजी महर्जन
येँया थँबहि लागाय् द्यः मय्जु महर्जनया छेँय् ग्याँसया रेगुलेटर छ्वम्हुया मि नःगु दु । म्हिगः बुधवाः सुथय् साढे ६ ताःइलय् उगु छेँय्या मातनय् बालं च्वनाच्वंपि मनूतय्सं जा थुइगु झ्वलय् अथे आकाझाकां ग्याँसया रेगुलेटर छ्वमुया मि नःगु खः धकाः बालं च्वनाच्वंम्ह नहेन्द्र नारायण पाण्डें जानकारी बियादीगु दु । अथे मि नयाः उगु छेँया बालं च्वनाच्वंम्ह पाण्डेया क्वथाय् च्वंगु तिसा वसः टिभी यानाः थ्यंमथ्यं ५ लाख तका बराबरया क्षति जूगु दुसा अथे हे व हे छेँय् उगु हे तल्लाय् च्वंगु हिमालयन इन्टरनेट क्याफेय् नं थ्यं मथ्यं निगू लाख तका बराबरया क्षति जूगु दु ।
उगु मि दमकलं स्यायेगु झ्वलय् हे छ्यलिइ तयातःगु पश्मिना पसलय् न थ्यंमथ्यं ५० हजार तका बराबरया क्षति जूगु दु । छेँ च्यानाः छेँथुवाः द्यःमय्जु महर्जनया थ्यंमथ्यं साढे २ लाख बराबरया क्षति जूगु दु । इलय् हे दमकल थ्यंकः मवःगु जूसा अझ अप्वः क्षति जुइफैगु अनुमान याःगु दु । थ्व हे झ्वलय् म्हिगः बुधवाः हे थापाथलीया ब्लूबर्ड डिपार्टमेन्ट स्टोरलिक्क बालकृष्ण प्रधानया छेँय् कःसिइ तयाःतःगु सिँ आकाझाकां च्याःगु दु । उगु मि प्रहरी व दमकलं नियन्त्रण काःगु खः ।
