नेवाः राजनीतिक सम्मेलनया निति ख्वपय् ब्यापक तयारी
ख्वप (झीगु स्वनिगः)
वइगु मंसीर १७ गते नेवाः राष्ट्रिय राजनीतिक सम्मेलनया उद्घाटन समारोह व सांस्कृतिक झाँकी नापंया र्यालीया नितिं ख्वपय् ब्यापक रुपं तयारी यानाच्वंगु दु । थ्व हे झ्वलय् वइगु शुक्रवाः ख्वपय् ख्वप नगरपालिका व ख्वप जिल्लाया गाँ गामय् च्वंपिं नेवाःतय्गु छगू तःजिगु भेला यायेगु तयारी जुयाच्वंगु दु । मूल रुपं वइगु १७ गते ख्वपय् देय्न्यंकया नेवाःतय्सं याइगु र् याली नापं उद्घाटन समारोहयात गुगु कथं ताः लाकेगु नापं ख्वपया नेवाःतय्त गुगु कथं सतकय् क्वत हयेगु धैगु खँय् सहलह ब्याकेगु निति अथे शुक्रवाः तःजिक भेला यायेत्यंगु खः धकाः धाःगु दु ।
थ्व हे दथुइ ख्वपया ज्यापुतय्सं उखुन्हु धिमे बाजं मानन्धरतय्सं धिमे शाक्य बज्राचार्यतय्सं गुंला बाजं पुंतय्सं द्यः प्याखं व कुमाःतय्सं भैलः प्याखं हयेगु धकाः बचं बिइ धुंकूगु दु । अथे हे नेवाः खलः पुचःत मध्ये विराट नेपालभाषा साहित्य तःमुँज्या नेपाल साहित्य मन्दिर नेवाः गुथि व इन्द्रायणी सांस्कृतिक समाज ख्वप कचा नापं अखिल नेपाल प्रगतिशील जनस्वास्थ्यकःमि संघया ज्याकःमिपिसं तुयु कोट फिनाः ब्यानर लिसे र्यालीइ ब्वति कायेगु धकाः बचं बिइधुंकूगु सीदुगु दु ।
नेवाः स्वायत्त राज्य मंकाः संघर्ष समितिया ग्वसालय् जुइगु उगु सम्मेलनया उलेज्या व र्याली ख्वप नगरय् याइगु जूसां उखुन्हु हे १७ गते ख्वप जिल्ला दुने लाःगु मध्यपुर थिमि नगरपालिकाय् बन्द शत्र याइगु जूगु दु । १८ गते नं बन्द शत्र याये धुंकाः १९ गते थिमिइ हे तःजिक र्याली यानाः नेवाः राष्ट्रिय राजनीतिक सम्मेलनया घोषणा सभा तकं यायेगु धकाः तयारी याःगु दु ।
