१० गू राज्य समितिपाखें रिपोर्टिङ क्वचाल

सर्वहारा जनवादी अभ्यास

पालुङटार (झीगु स्वनिगः)

गोर्खाया पालुङटारय् वंगु आइतवाःनिसें न्ह्याःगु संविधानसभाया दकले तःधंगु दल एकीकृत माओवादीया विस्तारित मुँज्याय् राज्य समितिया नेतातय्सं तसकं थःिपं खुल्ला जुयाः नुगः खँ तयाः छगू कथं सर्वहारा जनवादी अभ्यास याःगु दु । राज्य समितिया प्रतिनिधितय्सं न्वंवानादीगु झ्वलय् पार्टीया स्वम्ह नेतातय्सं न्ह्यब्वयादीगु राजनीतिक प्रतिबेदनयात कयाः टिप्पणी यायेगु नापनापं आः माओवादी पार्टी थुगु कथं वनेमाः धकाः थःगु खँ तकं तयेगु यानादीगु खः ।

अथे कार्यकर्तातय्सं नुगःखँ तःगु इलय् पार्टीया शीर्ष नेतातय्सं ध्यानपूर्वक न्यनादीगु दु । म्हिगः बुधवाःनिसें ३० गू राज्य समितिया प्रतिनिधितय्सं न्वंवानादीगु खः । अथे राज्य समितिया प्रतिनिधितय्सं रिपोर्टिङ नापं नुगः खँ तयेगु ज्या म्हिगः सुथय् ८ ताःइलंनिसें न्ह्याकूगु खःसा म्हिगः न्हिच्छि हे अथे रिपोर्टिङ नापं बिचाः प्वंकेगु ज्या जूगु खः । छम्हसित १०-१० मिनेट तक ब्यूगुलि ३० गू राज्य समितिया स्वम्ह स्वम्ह यानाः ९० म्ह नापं स्वतन्त्र कथं न्वंवानादीपि नापं याना थ्यंमथ्यं सच्छिम्हस्यां न्ववाइगु जूगु दु ।

राज्य समितिया सच्छिम्हस्यां न्वंवाइगु जुयाः कन्हय् शुक्रवाः तक अथे रिपोर्टिङ तयेगु ज्या जुइगु अवस्था दु । म्हिगः बुधवाः ३० गू राज्य समितित मध्ये नेवाः तमुवान ताम्सालिङ मिथिला भोजपुरा अवध सेती महाकली भेरी कर्णाली मगरात थारुवान राज्य समितिया प्रतिनिधितय्सं न्ववानादीगु खः । थ्व हे झ्वलय् नेवाः राज्य समितिपाखें भास्कर दिवाकर व सुशील नापं स्वतन्त्र कथं पुरन गुरुङं थःथःगु बिचाः प्वंकादीगु खः ।