एमाले प्रमया चुनाव रद्द यायेगु पक्षय् दनीगु
येँ (झीगु स्वनिगः)
नेकपा एमाले प्रधानमन्त्रीया चुनाव रद्द यानाः न्हूगु हे प्रकि्रया कथं न्ह्याः वनेमाः धैगु पक्षय् दनीगु जूगु दु । एमालेया नेतृत्वं म्हिगः बुधवाः पार्टीया केन्द्रीय ज्याकू बल्खुइ व्यवस्थापिका संसदया अधिबेशन क्वचाये धुंकूगु अवस्थाय् आः प्रधानमन्त्रीया चुनाव पुलांगु हे कायम जुइ ला कि न्हूगु हे प्रकि्रयां वनी धकाः एमालेया कानून विभागया कानूनविद्तलिसे सहलह याःगु इलय् फुक्क धैथें कानून ब्यवसायीतय्सं रद्द जुइ धकाः धयादीगुलि आः एमाले उगु हे कथं प्रधानमन्त्रीया चुनाव रद्द यायेगु प्रकि्रयाय् वनी धकाः एमालेया छम्ह नेतां कनादीगु दु ।
इमिसं अधिबेशन अन्त्य जूगु अवस्थाय् विधेयक बाहेक संसदया फुक्क हे प्रकि्रया रद्द जुइ धकाः सुझाब बियादीगु खः । सहलह ज्याझ्वलय् ब्वति कयादीम्ह अधिवक्ता टीकाराम भट्टराई नं संचारकर्मीतलिसे खँल्हानादिसें धयादिल संसद् अधिबेशन अन्त्य जूगु अवस्थाय् विधेयक बाहेक संसदया फुक्क हे प्रकि्रया रद्द जुइ प्रधानमन्त्रीया चुनाव नं आः न्हूगु हे प्रकि्रयां शुरु यायेमाली ।
