बैठक बहिष्कारया ख्याच्वः

थनिंनिसें रिपोर्टिङ न्ह्यात, रिपोर्टिङयात स्वन्हु माः
बैठक अझ हे ताःहाकः जुइगु

पालुङटार (सन्ध्या टाइम्स)/थन न्ह्यानाच्वंगु एकीकृत माओवादीया विस्तारित बैठकय् थौं सुथय् ८ बजेनिसें ३० गू पुचःया स्वम्ह स्वम्ह प्रतिनिधि नापं स्वतन्त्र कथं राज्य समितिया दुजःतय्सं थःथःगु धापू तयेगु ज्या शुरु जुल ।

सुथय् ११ बजे तकया दुने प्यंगू राज्य समितिया १३ म्हेस्यां धापू तये धुंकूगु दु। प्रत्येक राज्य समितिया पुचःपाखें स्वम्ह नेताया स्वम्ह स्वम्ह हे प्रतिनिधिताखें रिपोर्टिङ तयेकेगु ज्या याःगु खः ।

सेती महाकाली राज्य समितिपाखें अध्यक्ष प्रचण्डया पक्षधर जुयाः तारमान स्वाँरं, किरण पक्षधर जुयाः शरदसिंह भण्डारी व बाबुराम पक्षधर जुयाः देवराज रेग्मीं न्ववानादीगु खः ।

अथे हे भेरी कर्णाली राज्य समितिपाखें युद्ध (प्रचण्ड), जीवन (किरण) व भौतिक (बाबुराम), उगु हे कथं थारुवान राज्यसमितिपाखें लीला भण्डारी (प्रचण्ड), इन्द्रजीत थारु (किरण), हरिश्चन्द्र उत्सव (बाबुराम), लेखराज रेग्मी (स्वतन्त्र) जुयाः न्ववानादीगु दु। मगरात राज्य समितिपाखें कुशल (प्रचण्ड), पारस मणि (किरण) व उज्वलं (बाबुराम) पक्षधर जुयाः न्ववानादीगु खःसा नेवाः राज्य समितिपाखें भास्कर (प्रचण्ड), दिवाकर (किरण) व सुशिलं (बाबुराम) पक्षधर जुयाः न्ववानादीगु खः ।

थ्वहे दथुइ म्हिगः ३० गू पुचलय् ब्वथले धुनेवं हे थःथःगु पक्षधरमनूतय्त ल्हाःचिं तयेकेगु ज्या जुइवं थुकिं गुटबन्दी यात धइगु द्वपं बिसें दार्चुलाया कार्यकर्तातय्सं बैठक हे बहिष्कार यायेगु ख्याच्वः बिउगु खःसा वयां लिपा नेतृत्वं हे हस्तक्षेप यानाः अथे ल्हाःचिं तयेकेगु ज्या दिके बिउगु खः। संस्थापन पक्षं आपालं टिकडम याना जूगु द्वपं बिसें मेमेपिं कार्यकर्तातय्सं नं बैठक बहिष्कारया ख्याच्वः बीगु यानाच्वंसां धाथें सुनां नं बहिष्कार हे धाःसा याःगु मदुनि ।

३० गू पुचःया ९० म्ह नापं मेपिं स्वतन्त्र व १७ बुँदे पक्षधर समेत यानाः बैठकय् थ्यंमथ्यं १०० म्ह नेतातय्सं रिपोर्टिङ तइगु जूगु दु। छम्हेसित १०-१० मिनेट ई बिउगु जुयाः रिपोर्टिङ हे स्वन्हु तक जुइगु जूगु दु। उकिं वंगु आइतवाःनिसें न्ह्याःगु माओवादीया विस्तारित बैठक न्यान्हु जक धाःगु जूसां ताःहकः जुइगु निश्चित जूगु दु ।

१७ बुँदे पक्षधरयात बिस्कं ई
पालुङटारय् माओवादीया विस्तारित बैठकय् जनमोर्चां माओवादीइ एकता जूवपिनिगु निंतिं ब्यागलं कथंया मत तयेत ई बिउगु दु। विस्तारित बैठक जुइ न्ह्यः हे तत्कालिन जनमोर्चाया नेतात अमिक शेरचन, दिलबहादुर श्रेष्ठपिंसं १७ बुँदाया व्यागलं प्रस्ताव माओवादीइ न्ह्यब्वःगु खः। आः उगु बुँदायात कयाः ब्यागलं कथं बिचाः तयेगु निंतिं नं ई बिउगु दु।

विस्तारित बैठकय् ब्वति कयादीपिं कार्यकर्तातय्त ३० गू ब्व थःगु खःसा उकी स्वम्ह स्वम्हेस्यां थःपिनि धापू तये दइगु जूसां १७ बुँदापाखें नं छम्ह छम्हेस्यां थःपिनि खँ तये दइकथंया ब्यवस्था याःगु खँ बैठकय् सहभागी छम्ह नेतां कनादीगु दु ।