स्वयम्भूया धर्म पासापिंत

सम्पादकजु,
ज्ञानमाला भजन स्वयम्भुया आजीवन जः द्वःछिं मल्याक दयेधुंकल । थ्व दक्व धर्मपासा हे जुल । अले आजीवन जः मखुपिं स्वयम्भू द्यइके झाईपं नं यक्व हे धर्मपासा भगवान शरण धाईपं दु थुकी मध्यय् नं आःयापिं पदाधिकारी व दुजःपिं नं दु । थुकी दुने नं आःयाम्ह छ्याँज्ये भाजु रमेश मानन्धर ला पासा जक मखु किजा नं खः । जिं स्वयम्भू वनेगु यानागु नीदँ दयेधुंकल । उबलय् निसें नाप नापं चाःहिलाः दुःख सुखयागु खँ ब्याकाच्वनाम्ह खः । आः वयाः वहे पासां जिगु खँयात तेरपुच्छर हे मयाःगुलिं साप नुगः मिछं । जिं ज्ञानमाला भजन बांलाकेगु व छुं छुं मिले मजूगु सुधार यायेगु लागिं निगू स्वंगू खँत नायः भाजु रत्नबहादुर राजकर्णिकार छ्याँजे, भाजु रमेश मानन्धर नापं मेपिं पदाधिकारीयात धयागु खः । अःखतं वय्कःपिसं जिं न्ह्याबलें विरोध यात धइथें लिसः बीगु गबलें जिउ जिउ धाइगु तर पू धाःसा वंकादीगु मखु । छु पदय् च्वन कि न्ह्याम्हं थथे हे जुइगु ला छु थें खय्त ला जि नं दुजः जुइधुनाम्ह खः । जिगु इच्छा धइगु ज्ञानमाला भजन हालेगु व मन हलुका यायेगु खः । जिं वय्कःपिंसं याःगु ज्या दक्व मिले मजू धयागु मखु । तरीका जक छुं छुं मिले मजू धयागु खः । वय्कःपिं खालि थवंथः जानाः जक ज्या यानादी । जिं स्वयेबलय् न्ह्यागु ज्या यानादीसां सल्लाहकार भाजुपिं व ज्ञानमाला भजनय् सः सिउपिंके सल्लाह यानाः ज्या यानादीसा बांलाइ ला अले ज्ञानमाला भजन आः गुलि बालानाच्वंगु खः व स्वयां नं अप्वः झःझः धाइ ला झीसं भजन हाले थें -
'क्रोध धयागु नुगलय् झीगु
ज्ञान मदयेवं झट्ट च्वं वइगु ।'

- कृष्ण मान डंगोल,
मखंगल्ली तुन्छेबाहाः, येँ ।

More Stories Like this