क्वचाःगु संसद व प्रमया चुनाव

चले जुयाच्वंगु संसद अधिवेशन बन्द जुइवं अन दुने प्रधानमन्त्री ल्ययेत जुयाच्वंगु चुनाव छु जुइ धइगु न्ह्यसः पिहां वःगु दु। चुनावय् याकःचा जूसां उम्मेदवारी बियाच्वंम्ह रामचन्द्र पौडेलया पार्टी नेपाली कांग्रेसं अधिवेशन क्वचाःसां प्रधानमन्त्रीया चुनाव जारी हे जुइ धइगु तर्क तयाच्वंगु दु। मेगु पार्टीतय्सं धाःसा अधिवेशन हे क्वचाःगु कारणं अन जुयाच्वंगु मतदान नं क्वचाःगु हे ठहर जुइ धासें आः प्रम चुनावया औचित्य मंत धकाः तर्क तयाच्वंगु दु। थुकिं यानाः अधिवेशन क्वचायेवं थ्व अधिवेशनय् जुयाच्वंगु प्रमया चुनाव क्वचाःगु जुइ लाकि जुइ मखु धइगु मेगु कानुनी विवाद पिहां वःगु दु। सर्वोच्च अदालतं उकुन्हु ति संसदय् जुयाच्वंगु प्रमया चुनाव औचित्यहिन खः धासें उकियात याकनं क्वचायेकि धकाः सभामुखयात आदेश बिउगु खः। सर्वोच्चया आदेशया आशय मथुयाः सभामुखं छुं हे निर्णय मयासे च्वनाच्वंगु खःसा आः अधिवेशन हे क्वचायेधुंकाः नं थ्व प्रकरण ल्यना हे च्वंगु दु धाल धाःसा उकियात अन्त्य यायेगु अधिकार सभामुखयाके नं मदइगु जुल। छुं जुयाः थ्व प्रकरण आः हे क्वचाल धाल धाःसां नं हानं मेगु समस्या वइ। अथे खःसा आः देशय् न्हूम्ह प्रधानमन्त्री ल्ययेगु गय् यानाः? वहालवाला प्रधानमन्त्रीं ला राजीनामा हे बियातये धुंकल। उकिं न्हूम्ह प्रधानमन्त्री मदयेकं मगाः। न्हूम्ह प्रम ल्ययेगु थाय् संसद खः। संसदं ल्यये मफुगु सिद्ध हे जुल। आः गनं ल्ययेगु? थुकिया लागिं राजनीतिक पार्टीतय्सं हानं नं सहमति दयेकेत संवाद मयासें मगाः। थ्व इलय् पार्टीतय्सं मतभेद त्वःताः संवादं समाधान मालेगु बाहेक आः मेगु विकल्प हे मदुगु खँयात लुमंकेमाः ।

More Stories Like this