बजेटपाखें छुं आशा मयाःसां जिउ

सरकारं अध्यादेशपाखें हःगु बजेट स्वय्म बजेट स्वयां नं थुकियात हःगु प्रक्रियाया कारणं चर्चित जुयाच्वंगु दु। चले जुयाच्वंगु संसदया अधिवेशन दिकाः अध्यादेशं बजेट हयेमाःगु ज्यायात राजनीतिक रुपं बांमलाःगु नजिरया रुपय् कायेगु यानाच्वंगु दु। स्वय्म बजेट हःम्ह अर्थमन्त्रीं नं अध्यादेशं बजेट हयेमाःगु सुखद ज्या खः धयादीगु मदु।
छगू ला अध्यादेशं हःगु बजेट, उकिसनं कामचलाउ सरकारं धाथें बजेट हयेगु यक्वं ई पुलेधुंकाः हःगु जुयाः थुकी खास हे तःधंगु खँ मदइगु स्वाभाविक खः। थ्व खास यानाः देशय् ठप्प जुइत्यंगु न्हियान्हिथंया आर्थिक कारोवारयात हानं न्ह्याकेत जक हःगु बजेट खः। छगू कथं थ्व महसें हे मगायेधुंकूगु बजेट नं खः। थ्व बजेट हयेगु ज्यायात माओवादीं पंगः थने मजिउ धइगु ला सकस्यां हे धयाच्वंगु खँ खः। छगू कथं माओवादीं उकियात कयाः सहमति नं प्वंकेधुंकूगु नं खः। तर सरकार सही प्रक्रियां मवंगु कारणं माओवादी लगायतया छुं दलतय्सं उकियात विरोध याःगु खः ।

थपाय्धंगु विरोधया दथुं वःगु बजेटं थ्व सम्पूर्ण विरोधयात म्हुतुप्वाः तिक्क लिसः बीगु खँय् शंका हे दु। बजेटया कार्यान्वयन पक्ष ला झीथाय् न्ह्याबलें कमजोर जुयाच्वंगु हे जुल। थुगुसी नं जुइगु खँय् शंका हे मदु। उकिसनं नीति व कार्यक्रम हे मतसे हःगु जुयाः थ्व बजेट छुं नं विषय प्रति जिम्मेवार जुइमाःगु आवश्यक हे मदुगु जुल। थ्व बजेट दैनिक ज्याखँयात सुचारु यायेत जक हःगु जुयाः थुकिं छुं तःधंगु उपलब्धी चूलाकी धकाः आशा यायेमाःगु नं आवश्यकता मदु। थ्व ब्वनेबलय् आशावादी खने दुगु छगू निराश बजेट खः ।

More Stories Like this