किपू महोत्सवया घोषणा

रश्मी नापित

"झीगु किपू, झीगु तजिलजि" धयागु मू नारा ज्वनाः न्ह्यायेत्यंगु "किपू महोत्सव" या नमूना प्रस्तुती कथं म्हीग किपूया लाय्कू त्वालय् छगू भब्य पत्रकार सम्मेलन जुल। पत्रकारतय्त हे मू पाहां कथं ब्वनातःगु उगु ज्याझ्वलय् किपूया बाघभैरबंनिसें लाय्कू त्वाः तक पत्रकारतय्त बसा लायाः साँस्कृतिक बाजागाजा सहित लसकुस यानाः न्ह्याका यंकूगु खः ।

ऐतिहासिक लागा किपू नेपाः देय्या हे छगू कलाकृति व संस्कृतिं भय्बिउगु थाय् खः। इतिहासया थीथी कालखण्डय् थःगु पराक्रमया आपालं दसु बीधुंकूगु किपू थौंकन्हय् नेपाःया हे छगू पर्यटक लागाया रुपय् विकास जुयाच्वंगु दु। थुगु ऐतिहासिक देय् किपूया परम्परा व साँस्कृतिक मूल्य गुलि दु धयागु खँ न्ह्यब्वयेगु आज्जुं "झीगु किपू, झीगु तजिलजि' धयागु मू नारा बिसें किपू महोत्सवया तयारी जूगु खः। किपूया कलाकृति व सुलाच्वंगु साँस्कृतिक सम्पदायात पिब्वयेगु ताः तयाः थुगु प्रदर्शनी जुइत्यंगु खः।
किपू महोत्सव ग्वसाः खलःया कजि राजमान महर्जनं माघ १९ गतेनिसें २३ गतेतक जुइगु "किपू महोत्सव" य् किपूया थीथी परम्परात ब्वयेगु खँ कनादिल। म्हीग जूगु नमूना प्रदर्शनीइ नेवाःतय्सं छ्यलीगु कू, सुकूया ध्वाखां मू पाहां जुयाः वःपिं पत्रकारतय्त लसकुस यानाः यंकूगु खः ।

किपूया थीथी दाफा खलःया गुरु, कतांगुलिपिनिगु नं उपथिति दुगु पत्रकार सम्मेलन न्ह्यानाच्वंगु इलय् नेवाःतय्गु थीथी परम्परागत ब्वज्या नं जूगु खः। किपू महोत्सवय् किपू लागाया थीथी त्वालय् थीथी इलय् हनीगु नखःचखःया नं प्रदर्शनी जुइगु जानकारी अन बिउगु खः। थुकिया लिसें महोत्सवया मू आज्जु किपूयात पर्यटकीय क्षेत्रया रुपय् विकास यायेगु, किपू लागायात बजारया रुपय् विस्तार यायेगु व सरसफाइया उत्कृष्ट नमुना ब्वयेगु खः धकाः नं धाःगु दु ।

किपू महोत्सवया आकर्षणया रुपय् किपूया थीथी त्वालय् न्यायेकीगु इन्द्रायणी जात्रा, गथांमुगः, गुंपुन्हि (झ्याँय्�झ्याँय् पापा), बाघभैरब, पीठ प्रदर्शन थेंज्याःगु साँस्कृतिक ब्वज्याया लिसें किपुली प्रचलित धाः, धिमे, दबःखिं, नाय्खिं, म्वाहालि, दाफा बाजंया नं ब्वज्या जुइ। थुकिया लिसें किपू महोत्सवय् नेवाःतय्सं छ्यला वयाच्वंगु थीथी थलबलयाव लिसें नसात्वँसाया ध्वाखा दयेकाः नेवाः वस्तीया प्रदर्शनी नं यायेगु ग्वसाः दुगु खँ नं कजि महर्जनं कनादिल। किपू महोत्सवया तयारीं मुक्कं किपूमितय्त हे उत्साहित यानाच्वंगु खनेदु ।

More Stories Like this