स्वनिगलय् माओवादी एलर्ट

माओवादीं कटवालयात चीकां त्वःतीगु

राजनीतिक पार्टीतय् दथुइ विवाद कायम हे जुयाच्वंसां नं माओवादी नेतृत्वया सरकारं प्रधानसेनापति रुक्मांगद कटवालयात चीकां त्वःतेगु तयारी यानाच्वंगु खँ सीदुगु दु । विज्ञ सूत्रं बिउगु जानकारी कथं माओवादीं कटवालयात चीकेगु लागिं नेपाली कांग्रेस, एमालेया शीर्ष नेतातय्लिसे वार्ता यानाच्वंसां नं दुनें दुनें धाःसा कटवालयात चीकां त्वःतेगु तयारी नं यानाच्वंगु दु ।

सूत्रया कथं सरकारं सम्भवतः थौं हे नं कटवालयात चीकेगु ज्या यायेफु । कटवालयात चीकेगु निर्णय सार्वजनिक जुइसातकि छुं तःधंगु घटना जुल धाःसा उकिया प्रतिकार याये मालेफु धकाः माओवादीं थौं स्वनिगःया थीथी थासं ततःधंगु प्रदर्शन यायेत कार्यकर्तायात निर्देशन बिउगु दु । थौं सनिलया ४ बजे माओवादीं येँया कालिमाटी, कोटेश्वर, चाबही, ग्वंगःबुँ, सोह्रखुट्टे व यलया लगं ख्यलं जुलुस पिकायेत्यंगु दु । छुं जुयाः अबलय् तक सरकारं कटवालयात चीकेगु निर्णय यायेधुंकूगु जूसा जुलुसं उकियात लसकुस यासें नारा थ्वयेकेगु व निर्णय मवःनिगु जूसा याकनं कटवालयात चीकि धकाः नारा थ्वयेकेगु निर्देशन वंगु खँ नं धाःगु दु । सरकारं कटवालयात चीकेगु निर्णय यात धाःसा सेनापाखें उकिया अवज्ञा याइ धइगु खँ पिहां वयाच्वंगुलिं माओवादीं सतकय् प्रतिकारया तयारी यानाः जक थुकिया निर्णय यायेत्यंगु खँ नं सूत्रं धाःगु दु ।

उखे समस्या समाधानया लागिं एमालेपाखें अनौपचारिक रुपं न्ह्यःने हःगु प्याकेजयात माओवादी व नेपाली कांग्रेस निगुलिं पार्टीं आंशिक रुपं जक स्वीकार याःगु खँ सीदुगु दु । माओवादीं रक्षा मन्त्री रामबहादुर थापा 'बादल' यात राजीनामा बीकेगु खँयात स्वीकार मयाःसा कांग्रेसं प्रधानसेनापति कटवालयात राजीनामा याकेगु खँयात स्वीकार मयाः । निगुलिं पार्टीपाखें थज्याःगु प्रतिक्रिया वःगुलिं एमालेया थ्व प्रस्ताव कार्यान्वयन जुइगु सम्भावना तसकं म्हो जक दुगु खँ सूत्रं धाःगु दु ।

मेखे कटवालयात चीकेगु बारे माओवादीं थौं नेपाली कांग्रेस व एमाले लिसे सहलह ब्याकेगु ग्वसाः ग्वया तःगु दु । थ्व झ्वलय् थौं सुथय् महाराजगंजस्थित नेकां सभापति गिरिजाप्रसाद कोइरालाया छेँय् वनाः कोइरालायात नापलाःगु दु । उगु वार्ताय् सहमति जूगुलिं वार्ता सफल जुल धकाः प्रम प्रचण्डं दावी याःसां कांग्रेस नेतातय्सं छुं सहमति मजू धकाः जानकारी बिउगु दु ।

थ्व बैठक लिपा थौं कांग्रेसं एमालेया शीर्ष नेतातलिसे नं वार्ता याइगु ग्वसाः दु । सिंहदरवारय् थ्व वार्ता जुइत्यंगु खः । थ्व वार्ता स्वयां न्ह्यः थौं कांग्रेसया केन्द्रीय बैठक नं च्वनेत्यंगु दु । लिसें थौं हे माओवादी, कांग्रेस व एमालेया मंकाः बैठक च्वनीगु नं ग्वसाः दु ।