राष्ट्रसंघया अधिकारी व माओवादी नेतादथुइ सहलह

येँ (झीगु स्वनिगः)

संयुक्त राष्ट्रसंघं मस्तय्त हिसाय् छ्यलीगु धलःपाखें एकीकृत नेकपा माओवादीयात चिकीगु जूगु दु । सशस्त्र द्वन्द्व व मस्त सम्बन्धी संयुक्त राष्ट्रसंघीय कार्यटोलीया मू क्लाउड हेलर नेतृत्वया पुचलं गोर्खाया पालुङटारय् मंगलवाः एकीकृत नेकपा माओवादीया शीर्ष नेतातय्त नापलानाः थुगु खँया जानकारी ब्यूगु खः । थ्व स्वयाः न्ह्यः संयुक्त राष्ट्रसंघं माओवादीयात द्वन्द्वय् मस्तय्त छ्यलीपिनिगु धलखय् तःगु खः । पालुङटारया ठाँटीपोखरीसं च्वंगु प्रचण्ड निबासय् जूगु नापलाये ज्याय् हेलरं लिपांगु खुसिइ माओवादीं मस्तय्त द्वन्द्वय् मछ्यगुलि वइगु अप्रिल महिनातक्कया दुने उगु धलःपाखें चीकेगु जानकारी ब्यूगु माओवादी विदेश विभाग प्रमुख कृष्णबहादुर महरां जानकारी बियादीगु दु ।

राष्ट्रसंघया अधिकारीतयस शान्ति प्रकृया व सेना समायोजनय् जुयाच्वंगु ढिलासुस्तीप्रति च्यूताः प्वंकूगु दु । नायः प्रचण्डं बिस्तारित बैठकलिपा शान्ति प्रकि्रया सेना समायोजन लगायतया राष्ट्रिय महत्वया विषयसं प्याकेजय् हे लिच्वः पिकायेगु व दलतलिसे सहलह न्ह्यःने न्ह्याकेगु नापं जानकारी बियादीगु दु । माओवादी बिस्तारित बैठकय् जनसेनाया नं ब्वति दुगु मदुगु बारे धाःसा सहलह मजूगु नापलाये ज्याय् ब्वति दुम्ह अनमिन प्रमुख करिन ल्यानग्रेनं जानकारी बियादीगु दु । माओवादी नेतातयत नापलानाः संयुक्त राष्ट्रसंघया पुचः मंगलवाः हे येँ लिहाँ झाःगु खः ।