पौडेलया उम्मेदवारी स्वतः खारेज : आचार्य

येँ (झीगु स्वनिगः)

नेकपा एमालेया मू सचेतक भीम आचार्यं संसद अधिवेशनया अन्त्यलिसे काङ्ग्रेस नेता रामचन्द्र पौडेलया उम्मेदवारी नं स्वतः खारेज जूगु धयादीगु दु । म्हिगः येँय् रिपोर्टस् क्लबपाखें ग्वसाः ग्वःगु छगू साक्षात्कारय् वय्कलं अधिवेशनया अन्त्यलिसे पौडेलया उम्मेदवारी नं खारेज जूगु धयादीगु खः । वय्कलं न्हूगु अधिवेशनय् न्हूगु प्रकि्रया न्ह्यःने न्ह्याकाः प्रधानमन्त्रीया निर्वाचन संविधानया धारा ३८ 'क' कथं न्ह्याकेमाःगु बिचाः प्वंकादीगु दु । थःम्हं कोशी चलःया विषयसं तयाःगु प्रस्तावदथुइ कारबाही मजुइकं अधिवेशन अन्त्य जुयाः प्रस्ताव नं अन्त्य जूगु न्ह्यःथनादिसें आचार्यं फुक्ककथंया प्रस्ताव छगू हे जूगुलि पौडेलया उम्मेदवारी हाकनं च्वनेमफइगु धयादीगु दु । वय्कलं संसदय् न्ह्यब्वइगु फुक्क प्रस्तावया हैसियत छगू हे जुइगु व संसदय् नजिर नं कानूनसरह जुइगु जूगुलि प्रचलनया आधारय् नं रामचन्द्र पौडेलया उम्मेदवारी खारेज जुइगु स्पष्ट यानादीगु दु । विक्रम सम्बत् २०४८ सालनिसें हे संसदय् प्रस्तावत छगू अधिवेशनपाखें मेगु अधिवेशनय् यंकूगु नजिर मदुगु वय्कःया धापू खः ।