ग्यानावःगु आभाष ब्यूगु दु

एकीकृत नेकपा माओवादीया खुक्वःगु विस्तारित बैठक वंगु आइतवाःनिसें गोरखाया पालुङ्गटारय् न्ह्यानाच्वंगु दु । उगु विस्तारित बैठकय् माओवादीया कार्यकर्तालिसे आपालं जनसेनाया ब्वति दुगु खःसा जनसेनाया ब्वति यात कयाः सरकारं म्वाः मदुगु ध्वाँग फुकय् यानाः माओवादीया कुंखिनेगु लिसलिसे बदनाम यायेगु ज्याय् सकि्रय जुयाः प्रतिकि्रयावादीत छधी छप्पँ जुयाः न्ह्यःज्यानाच्वंगु दु । थ्व धइगु तप्यंक हे माओवादीयात गालय् क्वःफायेगु ज्या वर्तमान कामचलाउ सरकारया मन्त्रीतय्गुपाखें जुयाच्वंगु दु । तर एकीकृत नेकपा माओवादी नेपाःमि जनताया जनादेश प्राप्त पार्टी जक मजुसे नेपाःया हे दकले तःधंगु पार्टीकथं धस्वाके धुंकूगु खँयात उमिसं वाःचायेके फयेहे माः । एकीकृत नेकपा माओवादीया आः थौंकन्हय् गुगु विस्तारित बैठक न्ह्यानाच्वंगु दु । थुगु विस्तारित बैठकय् जनसेनाया गुगु ब्वति दुगु खः उगु ब्वतियात सरकारं बांलाःगु पक्षया रुपं अवश्य नं नालाः कायेमाःगु बाध्यता दु । थ्व गैर कानूनी ज्या मखु । छायधासा थुकिइ ब्वति दुिपं छु तहयािपं तक दु धइगु वर्तमान कामचलाउ सरकारं थुगु खँयात वाःचायेके फयाच्वंगु मदु ।

उकि आःया सरकारं विस्तारित बैठकय् ब्वति काःिपं जनसेनायात शिविरय् दुकाये मखु धकाः गुगु खँया बय्बय् यानाच्वंगु दु । थ्व बिल्कुल हे गलत खः । थुगु खँ थःथम्हं अःखतं बय्बय् जुइगु उपाय बाहेक छु नं मखु । खँ थुलिजक मखु कि विस्तारित बैठकय् सेनायारुपं सुयागु नं ब्वति मदुगु खँ थनं न्ह्यःथने बहः जू । मन्त्रीतय्सं शिविरया गेट न्ह्यःने ड्युटी यानाः जनसेनायात पनेगु खँ नं पाय्छि मजू । दसु कथं धायेगु खःसा - नेपाली सेनातय्त सरकारया हे मातहतय् छु नं बैठकया बारे जानकारी बिइगु निितं सःतल धाःसा उिपं वनेगु पाय्छि खः वा मखु थ्व खँयात बिचाः यायेमाः । अथेहे जनसेना छु गुगु मातहतय् उिपं जनसेनाय् दुहाँवनेत हःपाः चूलागु खः वहे कथं उगु हे पार्टीया बैठकय् ब्वति कायेगु अधिकार दु कि मदु थ्व खँया लिसः न्ह्याम्हसिनं अःपुक्क हे बिइ । खँ थुइके माःगु आवश्यकता दु । छुं खँ हे प्रष्ट मथुइक हचुवाया भरय् मनय् वःथे मचां खँ ल्हायेथें खँ ल्हानाः सु मनू नेता जुइमखु । उगु खँया महत्व दयेमाल अले अर्थपूर्ण जुइमाल । अले जक उम्ह मनू धात्थेंया नेता खः धइगु पुष्टि जुइ ।

उकि एकीकृत नेकपा माओवादीया विस्तारित खुक्वःगु विस्तारित बैठकयात कयाः स्वयम् पार्टीपाखें जक मखु सरकारया व्यक्तिपिसं हे उकिया प्रचार प्रसार यायेगु ज्या यानाच्वंगु खनेदु । थ्व बैठक राष्ट्रिय लिसे अन्तर्राष्ट्रिय ख्यलय् नापं बय्बय् जुयाच्वंगु दु । थुगु बैठकया निष्कर्ष गज्याःगु जुइ गज्याःगु परिणाम पिहांवइ धकाः फुक्कसिया ध्यान थुखेपाखे सालाः कयाच्वंगु दु । तर वर्तमान कामचलाउ सरकारया ध्यान धाःसा म्वाःमदुगु ध्वाँग फुकय् यानाः खःगु मखुगु खँया बय्बय् यानाः थः जक प्रचारय् वयेगु ज्या न्ह्याकाच्वंगु खः धइगु सकल नेपाःमि जनतां बांलाक्क हे ध्वाथुइकेफु । उकि आःया वर्तमान सरकार ग्यानावःगु आभाष ब्यूगु दु ।

More Stories Like this