सहलहया निती ३० गू पुचः दयेकल
थनिनिसें पुचःया नेतापाखें रिपोर्टिङ
येँ (झीगु स्वनिगः)
गोर्खाया पालुङटारय् वंगु आइतवाःनिसें न्ह्याःगु संविधानसभाया दकले तःधंगु दल एकीकृत नेकपा माओवादीया विस्तारित मुँज्याया झ्वलय् थनिनिसें स्वीगू पुचःया नेतातय्सं रिपोर्टिङ तयेगु ज्या न्ह्याइगु जूगु दु । विस्तारित मुँज्याया झ्वलय् म्हिगः मंगलवाः पार्टीया नायः पुष्पकमल दाहाल प्रचण्डं थःगु राजनीतिक प्रतिबेदन न्ह्यःब्वयादीगु खः । अथेहे सोमवाः पार्टीया बरिष्ठ न्वोकुपी मोहन बैद्य किरण व डा। बाबुराम भट्टराईपाखें नं थःथःगु राजनीतिक प्रतिबेदन न्ह्यःब्वयेगु ज्या क्वचाःगु दु ।
अथे स्वंगू हे प्रतिबेदन क्वचाये धुनेवं म्हिगः हे विस्तारित मुँज्याय् ब्वति कयादीिपं फुक्क हे कार्यकर्तातय्त ३० गू पुचः दयेकाः ब्वथलेगु ज्या याःगु खः । उगु ३० गू हे पुचलय् आः थःपिन्स गुगुकथं रिपोर्टिङ यायेगु धकाः सहलह शुरु याःगु खः । थनिनिसें उगु पुचःया नेतातय्सं पुचलय् वःगु खँयात दुथ्याकाः रिपोर्टिङ यायेगु ज्याझ्वः तयातःगु दु । माओवादीया उगु विस्तारित मुँज्यां गुगु कथं खँ पितहइगु खः धकाः नेपाःमितय्सं च्यूताः तयाच्वंगु दु ।
