माओवादीयात माईनस याये मजिउ
येँ (झीगु स्वनिगः)
नेपाल बार एशोसिएसनया पुलांम्ह नायः विश्वकान्त मैनालीं एकीकृत नेकपा माओवादीयात माईनस याये मजिउ धकाः धयादीगु दु । माओवादीयात माईनस यात धाःसा देशय् शान्ति प्रक्रिया गुगु नं हालतय् न्ह्याः वनीमखु धकाः धयादिसें माओवादीलिसे सहमति यानाः न्ह्याः वनेत नेपाली कांग्रेस व एमालेयात सुझाव नापं बियादीगु खः । म्हिगः सोमवाः युनिभस्रल पि फेडेरेसनं नेपाःया शान्ति प्रक्रियाया विषयसं याःगु अन्तक्रिया ज्याझ्वलय् न्ववानादिसें वय्कलं अथे धयादीगु खः । उगु ज्याझ्वलय् नेपाल परिवार दलया नायः नापं सभासद् एकनाथ ढकालं संविधानसभाय् दुथ्याःगु फुक्क राजनीतिक दलतय्सं देय् व जनताप्रतिया जिम्मेवारी बोध यानाः न्ह्याः वनेफत धाःसा देशय् दीगो शान्ति कायम जुइ धयादिसें उकिया नितिं फुक्क दल जिम्मेवारीकथं न्ह्याः वनेत इनाप नापं यानादिल ।
ज्याझ्वलय् नेपाली कांग्रेसया नेतालिसे प्रधानमन्त्रीया याकः उम्मेदवार रामचन्द्र पौडेलं व्यवस्थापिका संसदया अधिवेशन क्वःचाये न्ह्यः थःगु उम्मेदवारी तकं अन्त्य जुइ धकाः वयाच्वंगु हल्ला जक खः धकाः धयादिल । वय्कलं थःगु उम्मेदवारी गुगु नं हालतय् खारेज जुइमखु धकाः दाबी नं यानादिल । गबले व्यवस्थापिका संसदया अधिवेशन शुरु जुइ अबलेनिसें हे प्रधानमन्त्रीया चिर्वाचन प्रकि्रया न्ह्याइ धकाः नं धयादिल ।
