माय् अवसं : पारपाचुके कायेगु वा मकायेगु अवसं

थौं माय् अवसंया लिपांगु दिं अर्थात थनिनिसें येँया दक्षिणपाखे च्वंगु च्वबाहालय् कछलाथ्व एकादशि निसें पुन्हि तक तसकं कठिन व्रत कयाच्वंपिनिगु अन्तिम दिं खः । थौंया दिनस धलं दनाः थःथःगु छेँय् लिहां वनीगु खःसा थौं उगु ज्या च्वबाहालय् क्वचाःगु दु ।

माय् अवसंयात छगू कथं पार पाचुके कायेगु वा मकायेगु धइगु क्वःछीगु धार्मिक परम्परा कथं कायेगु याः । यदि निम्हतिपू छुं नं कथंया कचवं जुयाः मिले जुइफइगु अवस्था ब्वलन धाःसा वा बायेमाल धाःसा थुकथं अवसं च्वनीगु खः । अवसं च्वनेगु तसकं थाकूगु खः । थ्वहे झ्वलय् थौंया दिनस भाःतम्हेस्यां काःमवल धाःसा पारपाचुके याःगु सरह जुइगु खः । यदि मिसाम्हेसित भाःतं काःवल धाःसा हाकनं नापं च्वनाः जीवन हनेगु क्वःछित धइगु संकेत खः । थथे यायेगु इलय् थःथितिपिन्त भ्वय् नकाः अवसं च्वंम्हेसित थना यंकीगु खः । यदि भाःतम्हेसियापाखें काःमवल धाःसा थःछेँपाखें यंकीगु खः । थथे यंकल धाःसा मिसाम्हेस्यां पार काःगु सरह जुइगु खः । यदि निखलकं नं काःमवल धाःसा च्वबहाः द्यःयात हे लःल्हाइगु खः । छगू कथं धायेगु खःसा द्यःयात साक्षी तयाः निम्हेसिया जीवन गुकथं हनेगु धइगु निर्णय कायेगु दिं खः धकाः धाःसा पाइमखु ।

थौंकन्हय् थथे अवसं च्वनीपिं म्हो जक जूसां आःतक थुकियात निरन्तरता बियाच्वंगु खनेदु । तर थौंकन्हय् धाःसा नेवाःत जक मखु गैर नेवाःत नं थुकथं अवसं च्वंगु खनेदु । थ्वहे झ्वलय् थुगुसी नं अवसं च्वंपिं १८ म्ह दुगु खः । उकी ९म्ह नेवाःत खःसा ९म्ह गैर नेवाःत खः ।

थथे माय् अवसंया धलं दनीगु इलय् च्वबहालय् च्वंम्ह अवसं च्वंगु दुसा वय्कःयात थाकुलि यानाः धलं दनी । थ्वहे झ्वलय् थुगुसी च्वबहाःया देव कुमारी डंगोल थाकुलि जुयाः धलं दनेगु ज्या जुल । न्ह्याक्व हे म्हो उमेर जूसां च्वबहालय् च्वंपिं दत्तले मेपिन्त थाकुलि यानाः धलं दनीमखु धकाः स्थानीय मनूतय्सं धाःगु दु ।

च्वबहाः द्यःयात उपासना यात धाःसा म्ह बांलाइगु व ल्वय् मदया वनीगु बिश्वास याइगुलिं थौं कन्हय् पारपाचुके कायेगुया धार्मिक मान्यता स्वयां नं स्वस्थ उसाँय्या लागि अवसं च्वनेगु याना वयाच्वंगु खनेदु । थ्वहे झ्वलय् थुगुसी निम्हतिपू नं माय् अवसं च्वंगुलिं नं थुगु खँ पुष्टि यायेत तिबः बिउगु खनेदु ।

More Stories Like this