एकीकृत माओवादी विरुद्ध ओलीया डिजाइन

गोरखाय् माओवादीत येँय् माओवादी विरुद्ध प्रदर्शन

येँ (झीगु स्वनिगः)

न्ह्याबलें एकीकृत माओवादी विरुद्ध भूमिका म्हिताः वयाच्वंम्ह एमालेया स्थायी समितिया दुजः केपी शर्मा ओलीया डिजाइन कथं माओवादी विरुद्ध कामचलाउ सरकारय् दुगु दलतय्गु गोप्य मुँज्या सःताःदीगु दु । मुँज्याय् एकीकृत माओवादीया गोरखाय् जुयाच्वंगु विस्तारित मुँज्या नापनापं माओवादीया लिपांगु गतिविधियात कयाः गुगु कथं सरकारवादी पार्टीत न्ह्याः वनेगु धकाः सहलह ब्याकूगु खः । एमालेया केन्द्रीय ज्याकू बल्खुइ उगु कथं ओलीं थीथी दलया नेतातय्त मुँज्या सःताःदीगु खः । विषेशयानाः माओवादी बाहेकया मुँज्या धाःगु उगु ज्याझ्वलय् गुगु कथं माओवादीया साइज घटेयाये फइ धकाः सहलह ब्याकूगु खः ।

मुँज्याय् सरकारय् दुथ्याःगु न्हय्गू दलया नेतातय्सं ब्वति कयादीगु खः । माओवादी लिपांगु इलय् आक्रमक जुयावःगुिलं सरकारवादी दलत उकिया विरुद्ध गुगु कथं न्ह्याः वनेगु धैगु खँय् सहलह जूगु खः धकाः सूत्रं धाःगु दु । थ्वहे दथुइ एकीकृत माओवादीया राज्य समितिया स्तर तकया फुक्क हे कार्यकर्तात केन्द्रीय विस्तारित मुँज्या गोरखाय् वनाच्वंगु इलय् म्हिगः आइतवाः येँय् एमाले व कांग्रेसया भ्रातृ संगठनतपाखें माओवादी विरुद्ध धकाः प्रदर्शन याःगु दु ।