विस्तारित बैठकय् प्यंगू दस्तावेज
स्थायी समितिया बैठक ताःहाकः जूगुलिं सनिलय् जक उलेज्या
येँ (सन्ध्या टाइम्स)/एकीकृत माओवादीया खुक्वःगु केन्द्रीय विस्तारित बैठक थौं सनिलंनिसें न्ह्याकेत्यंगु दुसा उगु बैठकय् आः स्वम्ह नेताया प्यंगू राजनीतिक दस्तावेज पेश यायेत्यंगु खँ सीदुगु दु ।
गोरखा जिल्लाया पालुङटारय् थौं स्थायी समितिया बैठक च्वनाः विस्तारित बैठकय् स्वम्ह नेताया स्वंगू दस्तावेज व मंकाः दस्तावेज छगू नापं यानाः प्यंगू दस्तावेज पेश यायेगु निर्णय जूगु दु ।
थौं न्हिनय् १२ बजे विस्तारित बैठकया उलेज्या जुइ धयातःगु खःसां स्थायी समितिया बैठक ताःहाकः जुइगु जुयाः आः ३ बजे लिपा जक उलेज्या याइगु जूगु दु। पार्टी अध्यक्ष प्रचण्डं उलेज्या यानादीधुंकाः औपचारिक बैठक शुरु जुइ। बैठकय् पुचः पुचः दयेकाः प्यंगू हे राजनीतिक दस्तावेजयात कयाः सहलह ब्याकेगु नापं थःथःगु खँ तयेगु ज्या जुइ ।
विस्तारित बैठकय् ब्वति कायेत देय्न्यंकंया राज्य समितिया दुजः नापं केन्द्रीय दुजःत यानाः न्याद्वः व न्यासः सिबें अप्वः नेता कार्यकर्ता पालुङटारय् मुनाच्वंगु दु। थ्वहे दथुइ थौं हे पालुङटारय् केन्द्रीय कमिटीया बैठक च्वनीगु खँ वयाच्वंगु जूसां अन्तय् उगु बैठक रद्द याःगु दु। केन्द्रीय कमिटीइ हयेमाःगु खँ आः तप्यंक हे विस्तारित बैठकय् यंकेत्यंगु खः ।
उगु विस्तारित बैठकया लागिं माओवादी अध्यक्ष प्रचण्ड, उपाध्यक्षपिं मोहन बैद्य किरण व डा. बाबुराम भट्टराईया ब्यागलं ब्यागलं दस्ताबेज जिल्लास्तरीय दुजःतय्थाय् तक बहसया निंतिं यंकूगु खः। स्वम्ह नेताया स्वंगू हे दस्तावेजयात छगू हे यानाः छगू जक दस्तावेज पेश यायेगु कुतः जूगु खःसां व कुतः सफल धाःसा मजुल। आः स्वम्हेसिया बिस्कं बिस्कं नापं मंकाः दस्तावेज नं पेश यायेत्यंगु खः ।
जनसेना नं विस्तारित बैठकय्
थनिनिसें न्ह्याइगु माओवादीया विस्तारित बैठकय् माओवादीया राज्य समितिया दुजः समेत जुयाच्वंपिं द्वःछिम्हं मल्याक जनसेनां नं ब्वति काइगु जूगु दु। अनमिन नापं अमेरिका व कांग्रेस नेतातय्गु विरोध जूसां नं बैठकय् ब्वति कायेत सहभागी जनसेनात बैठकस्थलय् थ्यंकः वंगु दु ।
