दोष माओवादीयागु जक खः ला?

आखिरय् संसदय् ल्हाःल्हाः तयाः ल्वापु जूगु त्वहचिनाः सरकारं अध्यादेशपाखें बजेट हयां त्वःतूगु दु। सरकारया शुरुंनिसेंया मनसाय अध्यादेशं हे बजेट हयेगु खः। उकी माओवादीया सभासद्तय्सं याःगु 'आक्रमण' सरकारया लागिं बांलाःगु त्वहः जुया बिल ।

वंगु शुक्रवाः बहनी बजेट प्रस्तुत यायेत रोष्टमपाखे वनेत्यंम्ह अर्थमन्त्री सुरेन्द्र पाण्डेयात माओवादी सभासद्तय्सं लछारपछार याःगु घटनायात कयाः देय्न्यंकं तःधंक विरोध जूगु दु। सकसिनं उकिया लागिं माओवादीयात दोषी ठहर याःगु दु। खतुं माओवादी सभासद्तय्पाखें अज्याःगु घटना जूगु कारणं माओवादीयात हे दोषी खंकीगु स्वाभाविक खः। तर थ्व घटनाय् माओवादी छगू पक्षयात जक दोष बियाः मेपिं बचे जुया वनेगु अवस्था धाःसा मदु। माओवादी लगायत तःधंगु पार्टी धाःगु नेपाली कांग्रेस, नेकपा (एमाले) या नेतातय्सं वंगु ताः ई न्ह्यवंनिसें गुगु नौटंकी पहः वःगु ज्याखँ देशय् क्यना वयाच्वंगु खः, उकियात हे छगू उत्कर्ष रुप खः शुक्रवाःया घटना खः। यदि नेतातय्सं इलय् हे थःत सुधार मयात धाःसा देशय् अझ मेगु नं थज्याःगु घटनात मजुइ धाये मफु। संसद दुने हे मन्त्रीयात लछारपछार याइम्ह माओवादी ला दोषी ख हे खः, तर प्रमुख प्रतिपक्षीं रोके यायेक यायेकं जबर्जस्ती बजेट पेश यायेत स्वइम्ह अर्थमन्त्री नं कम दोषी मखु। यदि प्रमुख प्रतिपक्षीया विरोधयात वास्ता हे मयायेगु खःसा संसदीय व्यवस्थाया छु अर्थ दत? गन संसदीय मर्यादायात वेवास्ता याइ अन थज्याःगु हे घटना जुइगु खः। उकिं थ्व घटनायात वहे छन्हु जक मखु, वयां न्ह्यवंनिसें जुया वयाच्वंगु घटनातय्त नं समग्रताय् स्वयाः अध्ययन यायेमाः ।

More Stories Like this