कछलायंकं जुइगु नारायण मेला

लव कर्माचार्य

नेपाः छगू प्राकृतिक स्रोत साधनं भय्बिउगु देय्यालिसें तजिलजि व नखःचखःया देय्कथं नं हलिमय् नांजाः। झीगु देशय् न्ह्यानाच्वंगु थीथी पर्व व थीथी द्यःया जात्रा झीगु देय्या साँस्कृतिक सम्पदा खः। अथे जूगुलिं झीगु देय् नेपाः हलिमय् धर्मभूमि, पुण्यभूमि, मोक्षभूमि, पवित्रभूमि, आनन्दभूमि व शुद्धभूमिकथं नं नांजाः ।

अष्ट भिन्न सत्य, त्रेता, द्वापर अन्तय् कलि युगय् जम्बूद्वीपय् भारतखण्डय् भारत वर्षय् आर्यावर्त हिमवत्खण्ड दक्षिण नेपाल मण्डलय् श्री पशुपति सन्य धान्य वासुकि क्षेत्र धकाः च्वय् न्ह्यथनागु थाय्या नां वइ।
शैव मतकथं पशुपति महाद्यःनसें कयाः यक्व महाद्यः, शिवलिङ्ग वासस्थान जुयाच्वंगु दु। थन ५० कोटी पीठ नां दःसांतबि मुख्य खनेदुगु किरातेश्वर, गोकर्णेश्वर, धन्येश्वर, इन्देश्वर, मृगेश्वर, भिमेश्वर, आदेश्वर, भिम मुक्तेश्वर, प्रतिवनेश्वर, कुलेश्वर, टंकेश्वर, त्रिपुरेश्वर आदि खः ।

देगलय् व खटय् बिराज जुयादीपिं स्वेत मच्छेन्द्रनाथ, रक्त मछेन्द्रनाथ (यल), रक्त मच्छेन्द्रनाथ (नाला) व आदिनाथ
(चोबाहाद्यः) खः। न्हापा न्हापा बुंगद्यःया रथ जात्रा याः थें चोबाहाद्यःया नं रथ जात्रा याः धइगु खँ न्यना तयागु दु।
नाथ हे नां वःपिं आजु भैरबपिं मध्ये येँया पचली भैरबनाथ, यलया बटुक भैरबनाथ, टिका भैरबनाथ (लेले), किपूया बाघ भैरबनाथ, येँ लाय्कूया काल भैरबनाथ, श्वेत भैरबनाथ, आकाश भैरबनाथ, वंघःया वाका भैरबनाथ, वंटु व हल्चो भैरबनाथ खः ।

मेगु नाथ दुपिं गोरखाय् गोरखनाथ, मदुसतः दुने गोरखनाथ, पनौतिया पुण्यमाता खुसि पारी दलिंच्वगुँ च्वय् आदि खः ।

गण नां वःपिं द्यःपिं सूर्य विनायक (ख्वप), जल विनायक (यल, क्वय्ना), अशोक विनायक (येँ, मदु), चन्द्र विनायक (येँ, चाबही), कार्य विनायक (यल, बुंग) आदि खः।

देवी हे नां वःपिं काली चामुन्डा अजिपिं भद्रकाली (लुमधि), श्वेतकाली (येँ, न्यत), रक्तकाली (येँ, कुलांभुलु), नीलकाली (लुमधि), दक्षिणकाली (फम्पि) खः ।

दुर्गा भगवती नां वःपिं पलाञ्चोक भगवती (काभ्रे), कालीञ्चोक भगवती, नुवाकोट भगवती (नक्वाः), नवसागर भगवती (नक्साल), शोभा भगवती (येँ विष्णुमतिया सिथ) ।

श्वरी नां वःपिं विजेश्वरी, कंकेश्वरी, चण्डेश्वरी, टंकेश्वरी (नील बाराही नं खः)। अथे हे वैष्णव मतकथं नाथ व नारायण नां वःपिं थथे दु - स्वदँय् छकः अनला पुरुषोत्तम मास लछियंकं मत्स्ये ग्राम मच्छेगां मच्छेपुरय् विराज जुया च्वनादीम्ह मच्छेनारायणया मेला नं जुयाच्वंगु खः ।

वंगु कतिंपुन्हिया कार्तिक ला क्यंकथं बाय् कृष्णादि पारुं कार्तिक ला क्यं कथं कछलाथ्व पारुंनिसें थीथी नारां द्यःयाथाय् मेला न्ह्यायेधुंकूगु दु। थथे मेला न्ह्याकेबलय् भुइजःसि (बुढानीलकण्ठ) नारायणय् कार्तिक शुक्ल कछलाथ्व द्वादशीकुन्हु मेला जुइ। कार्तिक शुक्ल कछलाथ्व कुष्माण्ड नवमि कुन्हु चांगुनारायण (ख्वप), विशंखु नारायण (यल), शिखर शेष नारायण (फर्पिङ्ग) व इचंगु नारायण द्यःयाथाय् भक्तजनपिं वनेगु याइ।
अथे हे कार्तिक शुक्ल कछलाथ्वया हरिबोधनी एकादशी कुन्हु प्यंगू थाय्या प्यम्ह नारायण सीकः वनेगु चलन दु। येँ नगर दुने जक थाय्मदु त्वाःया इखानारायण, मरु त्वाःया अट्को नारायण, न्हूघः त्वाःया नारायण व वन्दे त्वाःया वन्दे नारायण सीकेगु ज्या नं जुयाच्वनी। अथे ला कार्तिक शुक्ल कछलाथ्वया वैकुण्ठ चतुर्दशी व सकिमिला पुन्हि तक अन मेला न्ह्यानाच्वनी। दक्व नारायणत पश्चिम दिशामुखी जुयाच्वनीसा भुइजःसि नारायण छम्ह धाःसा आकाशमुखी जुयाः ग्वारातुलाच्वनी। तातापाक्कं वःपिं धर्मावलम्बीतय्त धाःसा थुगु मेला स्वयाः न्ह्याइपु तायाच्वनी ।

More Stories Like this