राष्ट्रिय ज्यापु दिवस-११३१ हनेगु निंतिं ज्याझ्व: सार्वजनिक

यःमरि पुन्हिया न्हियात ज्यापु दिवस कथं न्हयदँ न्ह्यः निसें हनावयाच्वंगु ज्यापु संस्कृति बिकास कोषया ग्वसालय् थुगु दँय् कंगः अजिमा खलः यटखां ब्यवस्थापनया भाला काःगु दु । नेपाल संवत ११३१ थिंलाथ्व पुन्हि (यःमरि पुन्हि) या न्हि तःजिक ज्यापु दिवस हनेगु निंतिं कंगः अजिमा खलः यटखां खुइस्वंगु त्वाःया प्रतिनिधि दुथ्याका न्यासः व प्यम्हेसिया मूल समिति दयेकुसें झिंस्वम्हेसिया कार्य ब्यवस्थापन समिति नीस्वन । उगु समिति अन्तर्गत थीथी झिगू उप समिति नान दयेकूगु दु । उगु उपसमिति मध्ये ज्यापु दिवसयात तःजिक हनेगु निंतिं प्रचार प्रसार उपसमितिं सनिवाः पत्रकार मुनेज्या यात ।

कंगः अजिमा खलःया कार्यब्यवस्थापन समितिया कजि पूर्ण नारायण महर्जनया नायसुइ न्ह्याःगु पत्रकार मुनेज्याझ्वलय् ज्यापु संस्कृति विकास कोषया पदाधिकारी, त्वाःया पदाधिकारी, थीथी संचार माध्यमया नेवाः पत्रकार उगु ज्याझ्वलय् मुनेगु ज्या जूगु खः । ज्याझ्वलय् थुगु दँय् कंगः अजिमा खलःया ब्यवस्थापनय् ज्यापु दिवस हनेगु निंतिं छु गज्यागु ज्याझ्व: यायेत्यनागु दु धैगु बारे जानकारी ब्यूगु खः । ज्याझ्वलय् प्रचार प्रसार उपसमितिया कजि न्हूच्छे काजि महर्जनं प्रेश विज्ञप्ती ब्वना न्यंकादीगु खःसा ज्याझ्व:या बारे नं जानकारी बियादीगु खः । ज्याझ्व: धल थ्व कथं दु -

मंसिर ९ गते : खुइस्वंगु त्वाःया प्रतिनिधि मुनेगु व नासः पुजा
मंसिर १८ गते : सुथय् हिदान न्हिनय् ३ ता: इलय् वहःया पाँय् म्वः पितबिइगु व विचार गोष्ठी
मंसिर २५ गते : स्वनिगःब्यापी प्रचार प्रसार कथं मोटरसाइकल र्‍याली
मंसिर २६ गते : प्रचार प्रसार कथं सांस्कृतिक र्‍याली
पौष ३ व ४ गते : कंकेश्वरी देगः व जःखः सरसफाई नापं ध्वाखा दयेकीगु, क्यालेण्डर पिथनेगु आदि ज्याझ्व: पितब्यूगु दु ।

अथेहे ज्याझ्व: कथं थिंलाथ्व पुन्हि, पौष ६ गते यःमरि पुन्हिया न्हि कंकेश्वरीं तःजिक र्‍याली पिथनेगु व बसन्तपुलीइ वया सभाय् हिलेगु ।

लुमंकेबह:जू यःमरि पुन्हियात ज्यापु दिवस कथं राष्ट्रिय मान्यता बिया राष्ट्रिय ज्यापु दिवसया लसताय् नेपाल सरकारं सार्वजनिक विदाया घोषणा तकं यायेधुंकूगु दु । नापं थुगु दँय् हनीगु ज्यापु दिवसयात पर्यटक बर्ष २०११ यात लक्षित याना सरकारया घोषणायात नं ग्वाहालि यायेगु तातुना काःगु दु ।

राष्ट्रिय ज्यापु दिवस - ११३१ या नेपालमण्डल डट कम अफिसियल वेबसाइट खःसा मैत्री एफ.एम. व रेडियो उपत्यका अफिसियल एफ.एम. खः ।

More Stories Like this