किपू महोत्सवया घोषणा

किपू (झीगु स्वनिगः)

किपूमितय्सं शनिवाः छगू तःजिगु सांकृतिक ज्याझ्वःया दथुइ वइगु माघ १९ गतेनिसें न्यान्हुतक किपूया जीवनत संस्कृतिया महोत्सव यायेगु धकाः घोषणा याःगु दु । किपूमिया ग्वसालय् किपूया लाय्कू त्वालय् जूगु समारोहलय् अथे किपू महोत्सव नमूनाया महोत्सवया रुपय् याये धकाः घोषणा याःगु दु । किपूया बाघभैरव लागांनिसें संचारकर्मीतय्त बसलायाः सम्मानयासें किपूया थीथी सांस्कृतिक बाजं थानाः घोषणा सभा नापं पत्रकार सम्मेलन जूगु लाय्कू त्वालय् अथे किपू महोत्सवया घोषणा याःगु खः । झीगु किपू झीगु तजिलजि धकाः किपूया म्हसीका विश्वय् न्ह्यब्वयेगु किपूयात छगू सरसफाईया ल्याखं नमूना शहरया रुपय् पिब्वयेगु किपूया मौलिक लजगायात विकास यायेगु नापं संस्कृति संरक्षण यायेगु निितं अथे किपू महोत्सव माघ महिनाय् यायेत्यनागु खः धकाः कजि राजमान महर्जनं घोषणा यानादीगु खः ।

उगु घोषणा सभा जुइन्ह्यः किपू महोत्सवया इलय् छु गुज्वःगु कथं प्रस्तुति जुइ धैगु नमूना कथं लाय्कू त्वालय् किजापुजा यानाच्वंगु यकंधाला म्हिताच्वंगु गथांमुगः थनातःगु हलमलि पासा तयातःगु छेलिबाकु म्हिताःच्वंगु नापं थीथी कथंया जीवन्त संस्कृति व जीवन पद्दति तकं न्ह्यब्वयातःगु खः । अथेहे अन दबःिखं धिमे नाय्िखं काहां बासुरी बाजा धाः बाजा लाखे प्याखं तकं आकर्षक रुपं प्रस्तुति याःगु खः । अथेहे लाय्कुलिइ वनेगु सतःक्व त्वालंनिसें हे नेवाःतय्गु थःगु कथंया ज्याभःनिसें ल्वाभः तकया दर्जनौं ध्वाखा दयेकातःगु खः । किपूमित नेवाः वसः पुनाः किपूया लाय्कू त्वाः छगुिलं झःझः धायेक नेवाः संस्कृतिया जीवन्त प्रस्तुति याःगु खः ।

लाय्कुलिइ जूगु नेवाः महोत्सवया घोषणा सभा नापं पत्रकार सम्मेलनय् किपूया त्वाः त्वाःया आखाःया कजि गुरु व कतांगुरु थीथी त्वाःया खलः पुचःया प्रतिनिधिपिन्त सम्मान कथं प्यंगू दर्जनं मल्याक ज्याथःपिन्तहने कथं दबुलिइ ब्वनेज्या याःगु खः । आखाःया प्रतिनिधित मध्ये दकले थकालिम्ह श्रीकृष्ण महर्जनया सभापतित्वय् जूगु उगु ज्याझ्वलय् सरिता महर्जनं लसकुस न्वचु बियादीगु खःसा रमेश महर्जनं सुभाय् न्वचु बियादीगु खः । ज्याझ्वः हिसिला महर्जन व रमेश महर्जनं न्ह्याकादीगु खः । उगु समारोहलय् अन हःगु फुक्क बाजंयात सुमंगल धुन पुइकेगु व थाकेगु ज्या छक्वलं हे याःगु खः । अथेहे ज्याझ्वलय् आखाःया प्रतिनिधिकथं हरिशरण महर्जनं थःगु बिचाः तयादीगु खःसा संचारकर्मीतय्गु न्ह्यसःया लिसः नं बिइगु ज्या जूगु खः । ग्वसाः खलकं किपू महोत्सवया नमूनाया रुपय् अथे लाय्कू लागाय् शनिवाः प्रदर्शन यानागु खः धकाः नं जानकारी ब्यूगु खः ।