किपू महोत्सवया भव्य तयारी

येँय्नं करीव ५/६ किलोमिटर जक दक्षिणपाखे लाःगु ऐतिहासिक नेवाः देय् खः किपू । समुन्द्र सतह स्वयाः करीव चार हजार फिट च्वय्या थ्व थाय् भौगोलिक रुपं तसकं हे न्ह्याइपुसेच्वं । पृथ्वी नारायण शाहं स्वकःतक ल्वानातिनि त्याकेफुगु थ्व छगू ऐतिहासिक नेवाः वस्ति खः किपू । बि.सं. १९९० या तःभुखाचं हे छुं हे लिच्वः मलाःगु किपू देय् दुने उमामहेश्वर(क्वाःच्व) देगः, बाघ भैरव देगः व चिलंच्व देगःया थःथःगु हे महत्वं जाः ।

मुक्कं नेवाः वस्ति व नेवाःया थःगु हे मौलिक तजिलजि दुगु थ्व पर्यटकिय रुपं नं तसकं च्वछाये वहःगु थाय् खः । उकिं हे थ्वयात आन्तरिक व वाह्य पर्यटकया गन्तब्य दयेकेया निंतिं किपूया दक्वं हे जाना 'झीगु किपू, झीगु तजिलजि' नामं किपू महोत्सव याइगु जूगु दु । थ्वहे वइगु नेपाल संवत् ११३१ पोहेलागा आमै निसें सिल्लाथ्व तृतिया (2nd Feb – 6th Feb, 2010), बि.सं.२०६७ माघ १९ गते निसें २३ गते तक याइगु थुगु किपू महोत्सवया जानकारी बीत थौं पत्रकार सम्मेलनयासें थुकीया घोषणा याःगु खः ।

किपूया प्रत्येक त्वाःया आःखाः हे ग्वसाःखलः जूगुलिं किपू छगूलिंयाना थ्यंमथ्यं झिंखुगू आःखाः व स्वंगू स्थानीय संस्था (आःखाः मदुगु त्वाः)या मंकाः ग्वसालय् जुइगु थुगु महोत्सवया विशेषता बिस्कं हे दइगु जूगुलिं थुगु महोत्सव झःझः धाइगु अनुमान यायेछिं । प्रत्येक त्वालय् थःगु त्वाः हे जक जिम्मा कायेगु जूगुलिं थःगु त्वाः यचुपिचु जुइगु धासें थथे यचुपिचु यायेत किपूया प्रत्येक छेँय् धूथल (Dustbin) उपलब्ध याकेगु गुकिंयाना किपू छदे हे यचुपिचु जुइगु ग्वसाःखलःया कजि राजमान महर्जनं ध्वाथुइकादिल । थथे यचुपिचु जुइगु थ्व किपू दे महोत्सव जःछि जक मखुसे महोत्सव सिधयेका नं थुकियात निरन्तर यानावनेगु खँ न्ह्यथनादिल । थुकथं थ्व किपूयात यचुपिचु जुइगु धइगु हे हलिमय् हे छगू दसू जुइगु धयादिसें यक्व हे पर्यटकत दुहां वइगु व शहरया रुपय् विकास जुइगु आशा प्वंकादिल ।

महोत्सवय् किपूया नेवाः मौलिक तजिलजि सिथिनखःनिसें शुरुजुयाः गथांमुगःतक जुइगु थीथी तजिलजि ब्वयेगु थुगु तजिलजि त थीथी त्वालय् स्वयेदइगु जानकारी बियादिलसा थौं हे नं हलमलःपासा तयेगु, यकंधाला म्हितेगु, छेलिबाकू म्हितेगु, गथांमुगः दयेकाःतःगु, वा पायेगु (पासा पायेगु), म्हपुजा, किजापुजा, घःलः म्हितेगु, भजन हालेगु, अय्ला कायेगु व पो हायेगु थें जाःगु नेवाः तजिलजित ब्वया क्यनातःगु खः । नापं पत्रकार सम्मेलन व घोषणा सभा जूगु थासय् नेवाः बसजाः गथेकि कू, सुकू, सिनाज्याकुसा आदिया ध्वाखा हे दयेका तःगु खःसा खतांमुगः, जःसि, फोसि आदि वसजाः नं ब्वयातःगु खः ।

महोत्सवया बांलाक प्रचार प्रसार यानादीत इनाप यासें याःगु पत्रकार सम्मेलन जूगुलिं फुक्कं पत्रकारतय्त न्हापां बाघभैरवया थाय् मुंकाः धिमेसहित बाजंथानां बस लायाः लसकुस याना लाय्कुलिइ तक यंकूगु खः । लायकूया राज दबुलिइ जूगु थुगु पत्रकार सम्मेलन व घोषणा सभाय् किपूया दक्वं आःखाःया गुरु, कजिपिनि उपस्थिति दुगु खःसा रमेश महर्जन व हिसिला महर्जनं ज्याझ्वः न्ह्याकादीगु खः । दक्वंबाजनं छक्वलं मंगल धून थानां शुरु जूगु थुगु ज्याझ्वलय् ग्वसाःखलःया कजि राजमान महर्जन व नविन जोशीं पत्रकारतय् न्ह्यसःया लिसः बियादीगु खः । बाहिगां दाफा खलःया कजि श्रीकृष्ण महर्जनया सभापतित्वय् जूगु थुगु ज्याझ्वलय् सरिता महर्जनं लसकुस यानादीगु खःसा रमेशमान महर्जनं सुभाय बियादीगु खः ।

(ज्याझ्वःया किपाया लागि थन क्लिक यानादिसँ । )

More Stories Like this