पालिभाषा व व्याकरण प्रशिक्षणया दसिपौ लःल्हात

परियत्ति अनुसन्धान कमिटीया ग्वसालय् जूगु पालिभाषा व संक्षिप्त व्याकरण कक्षाया प्रशिक्षार्थीतय्त थौं छगू ज्याझवःया नेपाल बौद्ध परियत्ति शिक्षाया सह-शिक्षाध्यक्ष ज्ञानपूर्णिक महास्थविरं दसिपौ लःल्हाना बिज्यात ।

ज्ञानपूर्णिक महास्थविरं पालि भाषा बुद्ध बचनया भाषा जूगुलिं थुकिं हे बौद्ध दर्शनया खँ बांलाक थुइका कायेफइगु खँ धयाबिज्यासें पालिभाषायात छ्यलाच्वंसा जक लुमनाच्वनीगु व थुकियात प्रशिक्षार्थीतय्सं वाः चायेकाः व्यवहारय् छ्यलेमाःगु कना बिज्यात ।

नेपाल बौद्ध परियत्ति शिक्षाया सह-परिक्षा नियन्त्रक भिक्खु निग्रोधपाखें शील प्रार्थना यानाः न्ह्याःगु थुगु ज्याझ्वलय् प्रशिक्षक अनागारिका अग्गयाणी बुद्ध शासनयात चीर स्थायी यायेगु लागि महत्वपूर्ण जूगुलिं पालिभाषा स्यनेगु ज्या न्ह्याकागु खँ धयाबिज्यात । अथेहे भिक्खु निग्रोधं पालिभाषा प्रशिक्षण कयादीपिन्सं बौद्ध परियत्ति शिक्षाया लागि येँ यल व ख्वपय् पालि भाषाया प्रशिक्षक जुयाः थःम्हेस्या सयेकाःगु ज्ञानयात छ्यलेत सुझाव बिया बिज्यासें पालि भाषाया प्रशिक्षकत अभाव जुयाच्वंगु व थुकिया लागि नेपाल बौद्ध परियत्ति शिक्षा केन्द्रपाखें ग्वाहालि यायेगु खँ धयाबिज्यात । परियत्ति अनुसन्धान कमिटीया संयोजक त्रिरत्न मानन्धरं बौद्ध दर्शनया प्रारम्भिक ग्रन्थत पालिभाषां लिपिबद्ध जुयाच्वंगुलिं बौद्ध शिक्षाया लागि पालिभाषा सयेकेमाःगु खँ धयादिसें थुगु पालि शिक्षा निरन्तरताया लागि थ्व न्हापांगु पलाः जूगु खँ कनादिल । ज्याझ्वलय् प्रशिक्षार्थीतपाखें जुजुमान महर्जन व दुर्गा देवी मानन्धर रेग्मीं प्रशिक्षण कक्षाया अनुभव कनादीगु खः ।

उगु ज्याझ्वलय् पालिभाषा कक्षा सुथांलाक्क न्ह्याकेत ग्वाहालि यानादीपिं सकलसित अनुसन्धान कमिटीया दुजः रश्मी राजकर्णिकारं सुभाय् देछानादीगु खः । वर्षावासया झ्वलय् स्वलायंक येँया विश्व शान्ति विहारय् थुगु प्रशिक्षण कक्षा जूगु खः ।

More Stories Like this