झापाय् गांगामय् नं भिंतुना ज्याझ्वः

नेपाल संवत् ११३१ न्हूदँया लसताय् झापाय् गांगामय् नं थीथी ज्याझ्वःयासे न्हूदँ हंगु दु । नेवाः देय् दबू, झापा जिल्ला समन्वय् कमिटीया सक्रियताय् गांनापं नगरय् नं न्हूदँ झःझः धायेक हंगु खः ।

थुगुसी नं न्हूदँ हनेगु तिथिइ विवाद ब्वलंगुलिं नेवाः देय् दबू, झापा जिल्ला समन्वय्या ग्वसालय् सहलह मुँज्या यासें न्हूदँ कार्तिक २१ गते (7th Nov., 2010) आइतवाः यायेगु क्वःछ्यूगु खः । न्हूदँ कुन्हु झापाया मू मू थायत काकडभित्ता, धुलावारी, विर्तामोड, सुरुङ्गा, दामन, भद्रपुर आदि थासय् बाजं व प्लेकार्ड सहित थीथी नारात हाला मोटरसाइकल र्‍याली याःगु खः ।

न्हापासिबें थुगुसी शहरय् जक लिमकुंसे गांगामय् नं नेपाल संवतया न्हूदँ व म्हपुजाया महत्वया बारे सीकेत ज्याझ्वःत याःगु दु । झापाया महारानीझोडाय् जूगु ज्याझ्वलय् नेवाः देय् दबू, झापाया नायः कृष्ण उदास मूपाहाँकथं झायादीगु खःसा म्हपुजा व नेपाल संवतया बारे ध्वाथुइकादीगु खः । महारानी नेवाः पुचःया नायः कालिदास श्रेष्ठया सभापतित्वय् जूगु थुगु ज्याझ्वलय् आपालं मनूत परम्परागत नेवाः वसः पुनाःवःगु खः । सभा जुइ न्ह्यः थीथी प्लेकार्ड व नारा थ्वयेकुसें र्‍यालीं गांचाःहिउगु खः ।

अथेहे मेचीनगरया खुट्टिडांगी गामय् नं न्हापांखुसी भिंतुना ज्याझ्वः जूगु दु । आपालं मनूत परम्परागत नेवाः वसःपुनांवःगु खःसा थीथी बाजं थाना नगर चाःहिउगु खः । र्‍याली धुंकाः जूगु सभाय् मूपाहाँ गणेश शाक्यजुं भिंतुना व नेपाल संवतया महत्वयाबारे ध्वाथुकइकादीगु खः ।

नेपाल संवत् ११३१ न्हूदँ हनेगु हे मेगु छगू ज्याझ्वलय् नेवाः देय् दबू, झापां नेवाः तजिलजिया प्रचार प्रसार यायेगु व थ्वयात ल्यंका तइपिं नेवाःत हे जूगु जूगुलिं प्रत्येक नेवाःया छेँय् थःगु परम्परागत वसः छजु व सुकुन्दा छगः तयेगु आज्जुं १५ गः सुकुन्दा, छगः त्वादेवाः व १० त्वाः हाकुपतासी मतिनाया चिं कथं गोला तया इनाब्यूगु दु । नेवाः देय् दबू, झापाया नायः कृष्ण उदासजुं थीथी भाग्यशाली व्यक्तिपिंत थ्व सिरपा इनाब्यूगु खः ।

More Stories Like this