अनुसन्धान प्रविधि प्रशिक्षण कक्षा क्वचाल

नेवाः जाति व थुकिया भाषा साहित्य संस्कृति लिपि आदि विषयस अध्ययन अनुसन्धानया ज्याय् हःपाः बीगु लागि नीस्वंगु सत्यहेरा अनुसन्धान सिरपाः समितिपाखें ने।सं। ११३१ कछलाथ्व १२ व १३ निन्हुयंक न्ह्याकूगु अनुसन्धान प्रविधि विषयस प्रशिक्षण कक्षा थौं क्वचाल ।

नेपालभाषा केन्द्रीय विभाग यलध्वाखाय् जूगु उगु प्रशिक्षण कक्षाय् अनुसन्धानया विषय, शैलि नापं भाय्लचंया एकरुपता व लिधंसा ज्वलंया विषयस प्रा. डा. सुन्दरकृष्ण जोशी, प्रा. प्रेमशान्ति तुलाधर व सह-प्रा. तुलसीलाल िसंहं प्रशिक्षण बियादीगु खःसा उगु कक्षाय् मुक्कं २५ म्हेस्या ब्बति कयादीगु खः । थुगुसी सत्यहेरा अनुसन्धान सिरपाःया लागि अनुसन्धान प्रतिवेदन लःल्हायेगु ई वि.सं. २०६७ माघ मसान्त तक क्वःछिनातःगु दुसा प्रतिवेदन नेपालभाषां जुइमाःगु खँ ग्वसाः खलकं धाःगु दु । अनुसन्धान प्रतिवेदनय स्तरीय व एकरुपता हयेगु लागि सिरपाःस ब्वतियादीपिं अनुसन्धातातय्त थुकथं प्रशिक्षण कक्षा न्ह्याका वयाच्वंगु खः ।

ने.सं. ११२९ स नीस्वंगु थुगु अनसन्धान सिरपाः समितिपाखें दुहांवःगु अनुसन्धान प्रतिवेदनत मध्ये दक्कलय् बांलाःगु निगू शोध ग्रन्थयात झिद्वः झिद्वः तका नगद व दसिपौ बीगु खः । सिरपाः दँय्दसं चौलाथ्व द्वादशी कुन्हु लःल्हायेगु जानकारी बिउगु दु ।

More Stories Like this