संसद ठप्प यायेगु ख्याच्वः
संविधान संशोधन धुंकाः बजेट
येँ (सन्ध्या टाइम्स)/व्यवस्थापिका संसदय् थौं न्हापां संविधान संशोधनया निंतिं सरकारं प्रस्ताव यंकीगु जूगु दु।
सरकारं संसदय् बजेट पेश यायेगु नितिं बाधा अड्काउ फुकाउ आदेश बीगु निंतिं प्रस्ताव याःकथं राष्ट्रपतिं म्हिगः बहनी हे आदेश बीधुंकूगुलिं थौं सरकारं न्हापां संविधान संशोधन पारित यायेगु व वयां लिपा जक न्हूगु बजेट प्रस्ताव यंकीगु जूगु दु ।
उखे सरकारं थौं संसदय् संविधान संशोधन प्रस्ताव हयेवं हे चिचीधंगु च्यागू दलं उकिया विरोधय् संसद हे ठप्प यायेगु ज्याझ्वः दयेकूगु दु ।
थौं सुथय् च्वंगु च्यागू चिचीधंगु दलया बैठकं कामचलाउ सरकारया सिफारिसया आधारय् राष्ट्रपतिं बाधा अड्काउ फुकाउ आदेश बीगु धइगु लोकतन्त्र, संसद व सांसदतय्त बेवास्ता याःगु खः धासें उगु आदेशया आधारय् सरकारं हइगु संविधान संशोधनया प्रस्तावयात गुगुं हालतय् नं पास याके मबीगु निर्णय याःगु दु। संशोधन प्रस्ताव हयेवं संसद हे ठप्प जुइकथंया ज्याझ्वः यायेगु खँ नेकपा (एकीकृत)या अध्यक्ष ऋषि कट्टेलं कनादीगु दु। एकीकृत, नेपाः पार्टी, जनमुक्ति पार्टी, सद्भावना सरिता गिरी, संघीय मञ्च, माले समाजवादी नापं च्यागू दलया नेतातय्गु बैठकं संविधान संशोधन प्रक्रियाया विरुद्ध संसद ठप्प यायेगु सहमति याःगु खः ।
ततःधंगु स्वंगू दलं राष्ट्रपतियात सक्रिय यायेगु कथंया अवस्था ब्वलंकूगु खँ न्ह्यथँसें बाधा अड्काउ फुकाउ आदेशया आधारय् संविधान संशोधनया ज्या यात धाःसा कन्हय् वनाः थ्व छगू कथंया नजिर जुइगु जुयाः गुगुं हालतय् नं उकियात स्वीकार याये मफइगु खँ नं नेता कट्टेलं कनादीगु दु। वय्कलं संसदया कार्यव्यवस्था समितिया बैठकय् तकं थुगु सः तयेगु जानकारी नं बियादिल ।
मन्त्रिपरिषद् स्थगित
संविधान संशोधन मजुइकं मन्त्रिपरिषदं नं बजेट पारित याये मजिउगुलिं थौं सुथय् च्वंगु मन्त्रिपरिषदया बैठक नं सनिलय् तकया नितिं स्थगित याःगु दु। संसदय् बजेट न्ह्यब्वये न्ह्यः मन्त्रिपरिषदं निं पारित यायेमाः।
सरकारं थौं ३ खर्ब ३८ करोड तकाया बजेट संसदय् प्रस्तुत यायेगु ग्वसाः ग्वयातःगु दु ।
