हैटीइ ब्वलंगु हैजाय् नेपाःया सेनायात द्वपं

करिब दछि न्ह्यः तिनि तःभुखाचं यानाः निगूत्या लाख मनूत सीगु हैटीइ आः ब्वलंगु हैजा ल्वय् नेपालं वःगु खः धइगु द्वपं बियाः अन कार्यरत नेपाःया शान्ति सेनायात आक्रमण यायेगु ज्या समेत जुयाच्वंगु दु। अन ब्वलंगु हैजा नेपालं वःगु मखु धकाः संयुक्त राष्ट्र संघ व अमेरिकाया अनुसन्धातातय्सं धालं नं हैटीया स्थानीय जनता पत्याः जुयाच्वंगु मदु। थ्वहे इलय् इलय् वयाः हैटीइ कार्यरत स्वीडेनया राजदूतं अन ब्वलंगु हैजां नेपालं हे वंगु खः धइगु खँ पुष्टि जुइधुंकूगु दावी यानाः हैटीया नेपाली शान्ति सेनायात अझ थाकुइगु परिस्थित ब्वलंका बिउगु दु ।

खतुं हैटीइ हैजा ब्वलनाः द्वःछिं मल्याक मनू सीधुंकूगु दुसा अझ मेपिं द्वलंद्वः प्रभावित जुयाच्वंगु दु। उकिं अनया आःया प्रमुख ज्या धइगु थ्व प्रकोपयात गय् यानाः जिउ पनेगु खः। हैजाया प्रकोप गनंनिसें ब्वलन धकाः उकिया स्रोत माला जुयां ब्वलनेधुंकूगु महामारी क्वलाइ मखु। यदि व नेपाः�पाखें हे वंगु खःसां नं उकिया बारे महामारी नियन्त्रणय् वयेधुंकाः सहलह याये जिउ। नकतिनि तःभुखाय्या कारणं लः, धः, मत आदि थेंज्याःगु भौतिक पूर्वाधारं बञ्चित जूवंगु देशय् हैजा ब्वलनेत विदेशं हे किटाणु वयेमाः धइगु मदु। थुकिया बिस्कं अनुसन्धानया आवश्यकता दु। हैटीया जनतां थःगु देशय् हैजा हःपिं धकाः नेपाली शान्ति सेनायात हे छाय् द्वपं बिल, उकिया बारे नं अनुसन्धान यायेमाःगु दनि। उकिं आःया लागिं हैजा नियन्त्रणय् कायेगु हे प्रमुख ज्या खः। अनावश्यक द्वपं बियाः नेपाःया शान्ति सेनायात गनं वयाच्वंगु दुसा सुरक्षा बीगु ज्या संयुक्त राष्ट्र संघं याना बीमाः ।

More Stories Like this