सिताके च्याउको उत्पादन सुरु

यल (झीगु स्वनिगः)

जापानय् तसकं बय्बय् जुयाच्वंगु सिताके च्याउ नेपालय् नं उत्पादन जुया वयाच्वंगु दु । अनुसन्धादाता डा. केशरीलक्ष्मी मानन्धरया झिदँया ताःहाकःगु कुतःलिपा थौंकन्हय् नेपालय् थुकिया उत्पादन जुयाः वयाच्वंगु खः । विशेष यानाः पहाडी क्षेत्रया ख्वाउँसे च्वंगु थासय् उत्पादन बांलाक्क जुइगु उगु च्याउ स्वास्थ्यया दृष्टिकोणं नं तसकं बांलाःगु कथं कयातःगु दु । उगु च्याउया सेवनं ब्लडप्रेसर सुगर थेंज्याःगु ल्वय्यात नियन्त्रण यायेत ग्वाहालि जुइगुया लिसलिसे उगु च्याउलय् थीथी कथंया भिटामिन नापं दुगु जानकारी बियादिल । उत्तिस कटुस लिसे ओखर थेंज्याःगु उत्तम किसिमया सिमाय् खेती यायेफइगु उगु च्याउ तयार जुयाः बजाः तक्क वयेत न्हय्लानिसें च्याला तक्क बिइगु नापं वय्कलं धयादिल । म्हो जक लगानीपाखें उत्पादन न्ह्याकेफइगु थुगु सिताके च्याउ व्यापारया दृष्टिकोणं तसकं लाभदायक दुगु कृषकतय्सं धायेगु याः । नेपाल कृषि अनुसन्धान परिषद्य् ज्या यानादी धुंकूम्ह डा। मानन्धर २०४९ सालय् अवकास कायेधुंकाः छुं छुं पासापिनिगु ग्वाहालिइ इमाडोलय् कृषि प्रविधि तालिम केन्द्रया पलिस्था यानाः कृषकतय्त तालिम बियाः च्याउया उत्पादनय् ग्वाहालि यानाः वयाच्वनादीगु दु । उगु केन्द्रय् च्याउया थीथी जातया पुसा बिजन उत्पादनया लिसलिसे कृषकतय्त थुकियाबारे तालिम बिइगु यानाच्वंगु दु ।

नेपालय् नं च्याउया बांलाःगु उत्पादन जुइमाः धइगु उद्देश्यं उगु केन्द्रया पलिस्था याःगु धयादीम्ह डा। मानन्धर नेपालय् प्रविधि जुयाः नं उकिया सही सदुपयोग यायेमफुगु नापं धयादीगु दु । स्वनिगः बाहेकया मेमेगु जिल्लाय् नं च्याउखेतीया माग दुगु कारण थीथी इलय् पिनेया जिल्लाय् नापं वनाः तालिम बिइगु यानाच्वंगु वय्कलं जानकारी बियादिल । आःतक्क लाखौं कृषकतय्सं थनंपाखें तालिम कयाः च्याउया खेती ताःलाक्क यानाः वयाच्वंगु वय्कःया दाबी दु । नेपाःिमं युवातय्सं च्याउ खेतीपाखें जुइगु फाइदायात थुइके मफुगु धयादिसें वय्कलं धयादी - च्याउ खेती यानाः कृषकतय्सं महिनाया लाखौं कमय् यानाः वयाच्वंगु दु तर युवावर्ग देशय् हे छुं यायेगु स्वयाः नं विदेश पलायन जुइगु यात तःधंगु तायेकी ।
विदेश पलायन जुयाच्वंिपं युवा जनशक्तियात च्याउ खेतीपाखे आकर्षित यायेफुसा देय्या अर्थतन्त्रय् नापं तःधंगु तिबः जुइगु वय्कःया धापू दु ।
न्या ला थें हे पौष्टिक तत्व दइगु च्याउया माग नेपाली बजारय् आपालं दु । तर युवावर्ग परम्परागत शैलीइ स्वयाः न्हूगु प्रविधिसहित उत्पादन यायेमास्ते वःगु कारण युवा वर्गतय्त लक्षित यानाः ईकथं थीथी तालिमया प्रबन्ध यायेगु यानाच्वंगु डा. मानन्धरं धयादिल । नेपालय् कन्ये गोब्रे व सिताके याना स्वंगू कथंया च्याउ नये ज्यूगु कथं कायेगु याः ।

More Stories Like this