च्वबाहाः मेला

किपू नगर दुने लाःगु च्वबाहाः । स्वनिगःया दक्ले च्वय् च्वंगु बहाः जुयाः हे च्वबाहाः धाःगु जुइमाः । सांस्कृतिक नापं ऐतिहासिक रुपं नं तसकं महत्वपूर्णगु कथं नालातःगु च्वबाहाःया थःगु हे कथंया महत्व दु । च्वबाहाःया मू द्यः धैम्ह ह्याउँख्वाः आजु खः । उम्ह द्यःयात च्वबाहाः द्यः नापं आनन्दधारी लोकेश्वर नं धायेगु याना वयाच्वंगु दु । च्वबहाः द्यःयाथाय् थौंकन्हय् न्हिया न्हिथं मेला जुयाच्वंगु दु । दँय् दसं लच्छि तक मेला जुइगु झ्वलय् वइगु सकिमिला पुन्हि तक अन मेला जुइ । विशेषयाना सुथय् सुथय् भक्तजनत वनीगु उगु मेलाय् यल व किपू लागाया नेवाःत अप्वः खने दइ । मेलाय् वनेगु निितं लँ धुच्छिं हे च्वबाहाः द्यःया म्ये हालाः वनीिपं नं मदुगु मखु । च्वबाहाः द्यःयाथाय् मेला ज्वःछि वनकी महारोग अर्थात कुष्ट रोगं तकं मुक्त जुइ धैगु जन धारणा दु । च्वबाहाः मेलाया हे झ्वलय् हरिवोधनी एकादशी खुन्हुनिसें पुन्हि तक माय् अपसं च्वनीगु नं चलन दु ।

विशेष यानाः इहिपाः जुयाः थः भाःत लिसे कचमच जुयाः थःछेँय् च्वनाः च्वनेमाःिपं मिस्त अन माय् अपसं च्वंवन धाःसा माय् अपसं थनिखुन्हु थः भाःतं काः मवल अर्थात तःसि लःल्हानाः काः मवल धाःसा सामाजिक रुपं पार पाचुके जुइगु मान्यता दु धकाः धाइ । न्हापा न्हापा उगु कथंया घटना तकं जूगु दु धकाः च्वबाहाःया स्थानीय मनूतय्सं धायेगु यानाः वयाच्वंगु दु । उलि जक मखु माय् अपसं च्वंम्हेसित थनीगु इलय् पुन्हि खुन्हु सुनां तःसि लःल्हानाः काइगु अर्थात सुनां काःवल व हे मिजं उम्ह मिसाया भात जुइ धैगु नं जन धारणा दु । - मूस्याः ज्यापु